Televiṡiån

Da Wikipedia.

C'l artìcul chè 'l è scrit in Bulgnaiṡ Emiliàn

Una däl prémmi televiṡión


La televiṡiån (parôla nôva ch'la vén dal grîg par "visiån luntèna") l'è ón dî mèz ed comunicaziån pió cgnossó e pió druvè int'al månd, ch'l è la trasmisiån e la difuṡiån luntèni d'imâgin e 'd són. L'è ón dî mèz ed comunicaziån ed mâsa. All'è stä invantä in dal 1925 a Lòndra, da John Logie Baird.

Considerè l'evoluziån d'la râdio, ch'la psêva trasmétter såul dî són, l'è stè strolghè par tant bâl d inventûr in di mondi 'd pajîs, prémma par l'esêrcit e pô i l'àn spargujè anch' a la zänt sóbbit dåpp la fén d'la secåṅnda guèra mundièl.

Sénd ch'l è fâzil da druvèr e ch'la cåssta anch pôc, l'è stè druvè anc dai giurnalésst e däl staziån radio e anc par trasmétter tànt fôrm ed divertimänt, cme dî film, dî telefilm e varietè bän cgnossó.

Cme la funziåṅna

Mänter che pr'al sån as psêva druvèr la téccnica d'la radio, par ripràṅnder as avéva da druvèr däl nôvi soluziån. I strulghénn ed trasmétter såura un schermo däli imâgin eletrònichi ripraisi par 'na telecamera e 'd trasmétteri pr'äli ånnd d'la radio.