Stringimi forte tra le tue braccia
|
C'l artìcul chè 'l è scrit in
Miranduléś |
 Force of Arms
| ||
| Stringimi forte tra le tue braccia | ||
 William Holden in na figùra dal film | ||
| Stric'um fòrt fra i tò bras 1951 | ||
|---|---|---|
| Regìa: Michael Curtiz | ||
| Scritōr: Orin Jannings • Richard Tregaskis | ||
| Atōr: William Holden • Nancy Olson • Gene Evans Frank Lovejoy • Paul Picerni • Katherine Warren Dick Wesson • Ross Ford • Argentina Brunetti | ||
| Müsica: Max Steiner | ||
| Léngua: Ingléś • Itagliàṅ | ||
| Dürä dal film: 99 minüt | ||
| Nasiōṅ: Stat Unî | ||
Stringimi forte tra le tue braccia (Stric'um fòrt fra i tò bras) 'l è 'n film ad guèra americàṅ in biànc e négar dal 1951 ad Michael Curtiz, vgnû fóra in séguit anc c'n al tìtul ad “A Girl for Joe”.
Sunt
Durànt la secónda guèra mundiàla i fant dla 36śma diviśiòṅ americàna dal sergìnt Joe Peterson dit “Pete” (William Holden) i cumbàt'n in Basitàglia, in dal muntàgni d'l Apenèṅ, cónt'r al trupi tedéschi. Dòp na batàja dûra c'n al nemìg ch'l'à lasâ su 'l camp dimóndi óm, al trupi aleàdi i s dàn'n al cambi e i fant ad Pete, in cal mèntar prumòs a tenènt da 'l magiōr Blackford (Frank Lovejoy), i pōlan cuntàr su sinc dè ad ripóś a Nàpuli.
Durànt un gir a 'l pòsti insém a 'l sergìnt Smiley McFee (Gene Evans), par védar se la sò muróśa la gh'à scrit da l'Amèrica, Joe al gh cata la tenènta Eleanor MacKay dita “Ellie” (Nancy Olson), na dóna vuluntària ch'l'iva bèla incruśâ la nòt prima a 'l simitèri. I dū i vàn'n a bévar quèl insém a 'l bar Mamma Mia, pò i faṅ un gir fóra sità in du i s dàn'n anc un baś. Ma la guèra la gh'à 'l sò règhli e la licénsa 'd Pete, ch'l è inamurâ dabòṅ, la finìs dòp sōl dū dè. Prima 'd turnàr a cumbàtar, lò al prumét a la Ellie ch'al la spuśarà.
Durànt na misiòṅ al tenènt 'l armàgn frî a na gamba mént'r al magiōr Blackford al mōr durànt un bumbardamènt. Purtâ a 'l uśdàł, Pete al diś al dutōr ch'l è stuf dal mutàgni e dla śmalta e ch'al n in pōl piò ad masàr e védar murìr di sò amìg. Na vòlta guarî Pete 'l è rifurmâ listés e 'l gh'à da turnàr in di Stat Unî in di dè a vgnir. Dasfrutànd na cà 'd campàggna ch'la gh'à śibî la sò amìga Lea (Amelia Cova) e di giōr'n ad parmés ch'la s éra tgnû bòṅ, l’Ellie la gh'à la manéra ad pasàr un pôc ad tèmp insém a lò e Pete, cuma prumìs, al la spóśa. Ma i sèns ad cólpa par la mòrt dal magiōr, al pinsēr ch'i sò cumpàgn i rìsćian la vita méntar lò al farà invéci na vita in ufìsi, 'l è 'n pēś tròp grôs da supurtàr. Pete al decìd acsè ad turnàr a 'l frònt par jutàr i sò óm.