Sotto il vestito niente - L'ultima sfilata

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Sotto il vestito niente
- L'ultima sfilata
Sotto il vestito niente l'ultima sfilata.png
La Burman e Dreymon in na figùra dal film
Sóta 'l vistî gnint - l'ultma sfilàda
2011
Regìa: Carlo Vanzina
Scritōr: Carlo Vanzina
Enrico Vanzina • Franco Ferrini
Atōr: Francesco MontanariVanessa Hessler
Richard E. GrantVirginie MarsanElena Cotta
Giselda VolodiAlexandra BurmanPaolo Seganti
Alexander DreymonMario CordovaRudy Smaila
Ernesto MahieuxVincenzo ZampaMiro Landoni
Müsica: Pino Donaggio
Léngua: ItagliàṅLumbàrd
Dürä dal film: 93 minüt
Nasiōṅ: Itàglia


«
'L ùnic amìg dal mudèli 'l è 'l spèć.»


Sotto il vestito niente - L'ultima sfilata (Sóta 'l vistî gnint - l'ultma sfilàda) 'l è 'n film śal dal 2011 ad Carlo Vanzina ch'al dascór incóra d'l ambînt dla mòda milanéśa in na ciàṿ śala dòp Sotto il vestito niente, sèmpar suo, dal 1985.

Sunt

'L è 'n dè dimóndi impurtànt p'r al stilìsta Federico Marinoni (Richard E. Grant), qvél dla sfilàda in dal tèmpi dla mòda ad Milàṅ dla culesiòṅ dal sò Atelier. 'L è 'n sucès bèl grôs par lò e p'r al sò sòci in afâr Max Liverani (Mario Cordova), anc par via dla top model Alexandra Larsson (Alexandra Burman) ch'l'à sfilâ par lò. Ma pò, invéci ad festegiàr insém, lì lē la s in và par sò cònt parchè l'è arliàda sèg. La decìd 'd andàr in discutéca insém a la sò amìga e mudèla Cris (Virginie Marsan) e a àtar dū ragàs. Dòp ès'r-as fata 'd alcool e ad dròga, l’Alexandra la vîṅ misa sóta da na màchina méntar la catàva sù òṅ di sò buclèṅ da par tèra e la mōr.

'L ispetōr sicigliàṅ Vincenzo Malerba (Francesco Montanari), rivâ in sal pòst insém a 'l sò jutànt Mancuso (Vincenzo Zampa), al n créd briśa ch'a sia stada na daśgràsia anc parchè in strada i gh'éran dū lampiòṅ e pò par tèra i n s védan minga ségn ad frenàda. Al pulisiòt al s persuàd incóra da piò ad qvél ch'al gh'à in tèsta quànd al fà a mènt che n'atra mudèla dla maison Marinoni, la Desideria Scotton (Vera Dragone), sinc an prima, l'iva pardû la vita cascànd śò par na fnèstra da 'l sèst piàṅ dal palàs in dua la vivìva. Al purtinàr dal residence, ch'al l'à vduda spaplàr-'s a tèra, al rispónd acsè in milanéś a Malerba ch'al gh'iva dmandâ se par lò a psiva èsar umisìdi: «N'è minga lü al pulisiòt?» (N è'l minga lò 'l pulisiòt?).

La nutìsia dla mòrt dl’Alexandra 'l è 'n brut cólp da mandàr śò par Federico e par la sò famìja: al sò muróś śōvan Bruce (Alexander Dreymon), la surèla Daria (Giselda Volodi) e la culaburadōra Heidi (Claudine Wilde), ex mudèla anca lē ma più in là c'n i an, a s sà ch'a vint-siē an la fèsta la finìs par tuti. Ma 'l mónd al và avànti listés e la cà Marinoni la gh'à 'd avér n'atra supermudèla par sìmbul, anc parchè i cuncurènt i n màncan minga, cuma 'l stilìsta Tanino Andò (Stefano Molinari) ch'l éra stâ 'l amànt ad Bruce par dū an prima che Federico al gh al purtìs via. L’Heidi la cata qvéla giùsta par caś in un marcâ: a s trata dal fiuràra śvedéśa ad màd'r itagliàna Britt (Vanessa Hessler) ch'la sumìlia dimóndi a la Larsson. Par la Cris 'l è 'n brut cōlp parchè la vliva lē cal pòst lè. Prima 'd andàr via da na séna ad lavōr, la mét in riga la rivàla dgénd-ag ch'l'è sōl na bruta còpia dl’Alexandra e na Pippi Calsetlùng da quàtar sòld e pò la punta 'l dî cóntar Federico parchè i faràṅ i cònt prèst. Al dè dòp l’Heidi la pòrta la Britt a star in dl'apartamènt ch'l éra stâ dl’Alexandra. In dal mént'r i 'ncróś'n al giurnalìsta 'd mòda più petégul ch'a sa gh sia, Giorgio Viganotti (Ernesto Mahieux) ch'al dmanda n'intervìsta cun la mudèla nóva prima ch'la dvintìs tròp famóśa.

Turnàda a cà la Cris la cata 'n mesàǵ dla Daria in dla segreterìa telefònica in dua la surèla dal stilìsta l'iva alvâ la vóś sèg parchè la n éra minga andàda a 'n apuntamènt c'n un stilìsta ad New York e 'l è ciàr ch'i Marinoni i la vōlan śbulugnàr a qualchidòṅ àtar. La Cris, incasàda négra, la telèfuna a la Daria dgénd ad dir a Federico sōl na paròla: Davos, lò al capirà. Ma a n gh'è minga l'ucaśiòṅ parchè la mudèla la mōr masàda in cà sua dòp ch'un manìac al l'iva ciamàda a 'l telèfun tirànd al fiâ cuma 'n malnét, cumpàgn a cuma 'l fava anc cun l’Alexandra.

A s fà viṿ da la Britt Beppe Luini (Paolo Seganti), ex marè dla Daria, mandâ via in na quàlc manéra da i Marinoni parchè al pinsàva sōl a i bèsi. Lì lò al gh śibìs un migliòṅ 'd euro par tōr śò i diségn dla culesiòṅ nóva ad Federico e par purtàr-'g-i ma lē la 'l para via. Beppe al vîṅ pò vdû par Mancuso a dascórar cun Andò in un giardèṅ pùblic. Cla sira lè, méntar la Britt l'è drē a far-'s un bagn, al manìac al s insfìlsa in dla sò cà e al śgranfgna un para 'd mudàndi. Malerba 'l al ciàpa: a s trata ad Giorgio ma lò al giùra 'd n èsar minga 'l sasèṅ ma sōl un purcùs ch'al gh catàva gust a ciamàr al mudèli a 'l telèfun quànd al s fava dal pugnéti.

Na sira la Daria e Federico i urganìśan na séna ad famìja insém a sò màdar Pina (Elena Cotta), anc parchè al stilìsta 'l à finî ad butàr śò la culesiòṅ par la stagiòṅ a vgnir e al gh la vōl far védar, lē ch'l'è na sarta e ch'la 'l à tirâ sù da pìcul faghénd-ag far i diségn di vistî ad gl'atōri 'd Hollywood. Quànd i èṅ là i bècan Bruce, ch'al s éra śluntanâ dgénd ch'al gh'iva da cambiàr-as la camìśa maciàda 'd spumànt, a far dal foto par cònt ad Tanino e qvést chè 'l è 'n brut cōlp par Federico ch'l al manda via anc s'al śōvan, prima 'd alvàr i tac, al léva la vóś sèg dgénd-ag ch'al vliva 'n prèmi par qvél ch'l à fat par lò. Più tard, méntar Bruce 'l è drē a far benśìna, qualchidòṅ al gh s davśìna e al gh tira dū scurtlàdi cupànd-al.

Al dè dòp, méntar la Britt la fà sù 'l ròbi dla Larsson par mét'r-i via, la cata na foto dl’Alexandra a lèt cun Bruce.

Culegamènt estéran