Selena Gomez

C'l artìcul chè 'l è scrit in Miranduléś

«

Kill 'em with kindness, go ahead, go ahead, go ahead now, we're runnin' out of time, chasing our lies, everyday a small piece of you dies, always somebody, you're willin' to fight, to be right, your lies are bullets, your mouth's a gun and no war and anger was ever won, put out the fire before igniting.»

(EN)(Kill 'Em With Kindness, 2015)

«

Masa-i esénd gentìl, và avànti, và avànti, và avànti adès, a n gh'ém più tèmp, curénd adrē a 'l nòstri buśìi, tut i dè na tò part pìcula la mōr, sèmpar qualchidòṅ, at sē dispòst a cumbàtar p'r avēr ragiòṅ, al tò bali i èṅ di prujètii, la tò bóca l'è na pistòla e gnanc na guèra e gnanc n'arlìa i èṅ mai stadi vinsi, smòrsa 'l fōg prima 'd impisàr-al.»

(MUD)

La Selena Marie Gomez (Grand Prairie, 22 ad Luj dal 1992, a s lèś [səˈliːnə ˈɡoʊmɛz] in ingléś) l'è na cantànta , atōra, ardupiadōra, prudutōra e imprendiōra americàna. La gh'à na stéla in dla Hollywood Walk of Fame.

In dla sò caréra l'à fat vgnir fóra quàt'r àlbum tacànd da 'l sò disc ad debùt Stars Dance dal 2013. Fra i sò pès più famóś a 'rcurdém Lose You to Love Me, Rare, Good For You, The Heart Wants What It Wants, Bad Liar, Come & Get It, Hands to Myself, Kill Em with Kindness e Who Says.

L'à tacâ na caréra da atōra in dal 2003 tulénd part a 'l film 'd asiòṅ Missione 3D - Game Over ad Robert Rodriguez. Atri pelìculi impurtànti i èṅ Monte Carlo (2011), cun l'Andie MacDowell e Giulio Berruti, Spring Breakers - Una vacanza da sballo (2012), fata insém a James Franco, Un giorno di pioggia a New York ad Woody Allen (2019) e Emilia Pérez (2024), òvra ch'la gh'à fat vìns'r al Prix d'interprétation féminine a 'l Fèstival ad Cannes.

Da imprendidōra l'à fat vgnir fóra di parfùm a sò nóm (Selena Gomez, Vivamore e Rare Eau de Parfum) e prudót al film 'd animasiòṅ dal 2022 Hotel Transylvania - Uno scambio mostruoso.

In televiśiòṅ, fra i àtar, l'à fat soquànti puntàdi di telefìlm Barney (trédas epiśòdi da 'l 2002 a 'l 2004), Hannah Montana, Sonny tra le stelle e Only Murders in the Building.