Segreti e diamanti

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Moscow Days, L.A. Nights
Segreti e diamanti
Segreti e diamanti.png
La Sean Young e Reef Karim in na figùra dal film
Segrét e diamànt
2003
Regia: Rodion Nahapetov
Scritùr: Rodion Nahapetov
Atùr: Rodion NahapetovSean YoungIgor Fokin
Nikolay DobryninLane DaviesRusty Meyers
Müsica: David G. Russell
Lengua: RusIngléś
Dürä dal film: 89 minüt
Nasiòṅ: Stat UnîRùsia


«
Lì lē l'è 'n mistēr, a gh'è 'l caś impusìbil da risòlvar par lò.»
(Tagline dal film)


Segreti e diamanti (Segrét e diamànt) 'l è 'n film 'd asiòṅ par la televiśiòṅ dal 2003 ad Rodion Nahapetov ch'al 'l à anc scrit e recitâ.

'L è 'n film ch'al mét insém di epiśòdi dla série televiśìva „Russkie v Gorode Angelov“.

Sunt

'L investigadōr rus Andrey Somov (Rodion Nahapetov) 'l è tut cuntènt parchè al gh'à da andàr a Los Angeles a catàr sò mujér, la balarìna 'd tango Rachael (Sean Young) ch'la lavóra insém a Omar Santini (Reef Karim) in dla sala da bal ad Richard Morris (Rusty Meyers). Prima 'd partìr da Mósca in aparéć par la Califòrgna però al gh'à 'n prubléma parchè 'l sò vèć culéga Kuskov (Nikolay Dobrynin), dit „Al maslàr“, al vōl far-'g-la pagàr a 'l sò cap Mikhail Mikhailovich (Igor Fokin) ch'al 'l iva fat métar dèntar dòp ch'l iva śbrandlâ 'n sasèṅ pedòfil. Mikhail al mōr ma Andrey al fà giustìsia listés faghénd spaplàr par tèra 'l „pcar“ dòp na cursa in si téǵ.

Adès ch'l à mis a pòst al ròbi al pōl partìr p'r andàr a star da la sò dóna. In d'l aparéć a gh'è n'hostess, la Zhanna (Irina Stemer), ch'la gh'à sèg di diamànt ad cuntrabànd lugâ in na butìglia cica 'd vodka. Ma quànd al sò muróś Levtei (Vladimir Orlov) al i vōl, lē la diś ch'la n i cata piò, qualchidòṅ 'l arà tòlt la butìglia par śbali. Ma l'è tuta na cumèdia parchè lē l'à catâ di àtar, sèmpar rus, ch'i gh śibìsan da piò. In cal méntar Andrey al sa stablìs a cà dla Rachael purtànd-'g in rigàl dal pés séc rus ciamâ vobla ma a n è mia abàsta parchè l'Amèrica 'l è 'n paéś câr da vìvar, biśógna che lò al cata subìt da lauràr. Al rispónd acsè a 'n anùnsi ch'l iva lèt su 'n giurnàł e al finìs drit da qvéi ch'i ìvan tòlt i diamànt da la Zhanna ma esénd in là c'n i an al n è mia bòṅ par lauràr par la sicurésa e dònca 'l è custrét a vénd'r al sò òr par pagàr soquànti buléti.

In cal méntar Levtei al s fà purtàr 'n àtar càrag 'd diamànt mis in dla fasa a 'l còl 'd un dobermann e pò al dà sènt dòlar a Andrey p'r andàr a tōr la bèstia in aeropòrt. Quànd chi lò al gh al pòrta, al caṅ, ch'a s ciàma Mavr, al scapa via subìt e al finìs in un canìl. Andrey al và a pascàr-al dapartùt e finalmènt 'l al pòrta a cà catànd anc i diamànt. Al decìd ad dar-i a la pulisìa, la Rachael la n la tōś minga tant bèṅ ma pò i dū i faṅ la paś e la dóna la decìd 'd andàr a vìvar sèg in Rùsia pròpria in di dè in dua Morris al vèṅ catâ mòrt scurtlâ. Durànt un viàś in màchina la còpia la decìd ad farmàr-'s in un bar par tōr qvèl, qvél dla Peggy (Sonja Ecker) e ad sò marè rus Ivan (John Sarkisian). Mént'r Andrey al fà na telefunàda, la Rachael la sparìs insém a tri hippy drugâ pódag ch'i gh'aṅ un caravan ch'a pâr un car ad carnevàł. Sò marè al partìs subìt par pascàr-la, jutâ da Ivan e dal sò anvōd Max Kubik (Christopher Hardie). La Rachael la vliva sōl tiràr anca lē ma i óm invèci i s la vōlan gusàr. In cal mént'r al tenènt McMillan (Pat Battistini) al taca a indagàr su la mòrt ad Morris. A s vèṅ a savēr che na vòlta la Rachael l'éra la sò spóśa e i tulìvan dla dròga ch'l éra 'n piaśēr ma anc che lò 'l iva quistiunâ c'n al sò sòci Santini ch'al s éra mis a balàr al tango c'n al sò muróś Eduardo (Steve Ashbel) in sala faghénd scapàr via tut i cliènt dal club. Inóltar Morris 'l iva fat falsificàr la firma 'd Omar par purtàr-ag via la sò mità dal club.

Culegamènt estéran