Seduzione letale
|
C'l artìcul chè 'l è scrit in
Miranduléś |
 The Most Dangerous Woman Alive
| ||
| Seduzione letale | ||
 La Merete Van Kamp in na figùra dal film | ||
| Sedusiòṅ letàla 1988 | ||
|---|---|---|
| Regìa: Christian Marnham | ||
| Scritōr: James Ellroy • Josh Friedman | ||
| Atōr: Merete Van Kamp • Shannon Tweed • Nita Robert Lipton • James Luisi • Deep Roy | ||
| Müsica: Meir Eshel | ||
| Léngua: Ingléś | ||
| Dürä dal film: 96 minüt | ||
| Nasiōṅ: Stat Unî • Sud Àfrica | ||
Seduzione letale (Sedusiòṅ letàla) 'l è 'n thriller dal 1988 ad Christian Marnham vgnû fóra in di Stat Unî c'n al tìtul ad “The Most Dangerous Woman Alive” ma anc “Lethal Woman”.
'L è stâ girâ in Sud Àfrica.
Sunt
A 'l inìsi di an Utànta la tenènta Christine Newhouse (Merete Van Kamp) la fà la suldàda a Fort Dor e l'è tròp brava in dal sò camp tant ch'la bat sèmp'r i sò culéga masć. Al sò cap, al culunèl Jerry Maxim (James Luisi), al fà fadìga a mandàr śò 'n quèl dal gènar e dònca al gh admànda ad lasàr vìnsar na quàlc vòlta anc chi óm ma lē gnint, arvèrsa cuma 'n bric la gh diś ad nò. Jerry alóra al gh fà védar chi a cmanda dabòṅ lè e al la viulénta.
Al muróś dla ragàsa, John Sales (Deon Stewardson), al próa a far-as dar dal spiegasiòṅ da 'l culunèl ma chi lò al gh diś ch'i éran 'd acòrd tut dū. A 'l prucès John al dà còrda a Maxim par psēr acsè cuntinuàr a far caréra in d'l eśèrcit e i giùdas i al làsan lìbar. La pòvra Christine la 'l ciàp' acsè in dal cûl, lē ch'l'éra armàśa vìrgin sōl p'r al sò teśôr, pròpria cum a vliva sò pàdar militàr prima ch'al murìs, méntar John 'l è invéci prumòs e 'l gh'à anc l'ucaśiòṅ ad purtàr-'s a lèt la mijór' amìga dla Christine.
In séguit la Christine la sparìs, tacànd a far-as ciamàr Diana, miténd però prima di anùnsi su na rivìsta ch'i dgìvan: „ÓM! Gh'î'v par caś qvél ch'a gh vōl par scampàr a n'aventùra eròtica?“. Tut i óm ch'i gh'aṅ pruâ, qvéi insaplâ in dal prucès, i èṅ però sparî anc lōr. Al generàł Grant (Larry Taylor) 'l órdna a 'l magiōr Derek Johnson (Robert Lipton) ad turnàr in servìsi p'r andàr-i a pascàr. Maxim 'l è stâ 'l ùltim a partìr par l'ìśula dla reclàm, cumpagnâ par dū hostess, la Karen (Nita) e la Caroline (Prudence Solomon), e na guìda, la Tory MacAllistair (Shannon Tweed). Rivâ là al culunèl al s éra catâ in mèś a 'n squantèr'n ad dóni tuti par lò ma, gnanc a dir-al, l'éra na trapla dla Christine ch'la vliva cupàr tut i respunsàbii di sò magòṅ. 'L ùltim dla lista 'l è pròpria Derek e la Diana la gh vōl dar la casa par pò tajàr-ag via la tèsta cum a tut chi àtar.