Rosy Mauro
|
C'l artìcul chè 'l è scrit in
Miranduléś |
La Rosa Angela Mauro, cgnusùda semplicemènt cuma Rosy Mauro (San Pirèṅ Virnòtic, 21 ad Luj dal 1962), l'è na pulìtica itagliàna dla Léga Nòrd, cun la carga ad vicepresidénta dal Senàt in dla XVI legiśladùra, tacàda in dal 2008.
Biugrafìa
Nada in dal Salènt a San Pirèṅ Virnòtic in pruvìnsa 'd Brìndaś, la Rosy la crés lè davśèṅ in dal Lecéś par pò spatinàr in dal 1980 a Milàṅ par pascàr lavór, tgnénd in bisàca un diplòma ad ragiunerìa. A vint-j-òṅ an la taca a tgnir a drē a i fat sindacài par la UIL in dla dita in du la lauràva.
In dal 1990 la càmbia bandéra pasànd a 'l Sindacàt Autunumìsta Lumbàrd. 'L 11 ad Nuvémbar dal 1999 l'è numinàda Segretària Generàla dal Sindacàt Padàṅ.
Sèmpar in di an Nuànta la taca a impgnàr-as anc in pulìtica par la Léga Nòrd faghénd la cunsiliéra cumunàla a Milàṅ. In dal 1993 la dvénta Presidénta dla Cumisiòṅ Lavōr e pò, in d'l Avrìl dal 2005, la fà al sò ingrès in dal parlamènt regiunàŀ lumbàrd diretamènt in dal listòṅ dal Presidènt dla Regiòṅ Roberto Formigoni.
A gl'elesiòṅ pulìtichi itagliàni dal 2008 la vèṅ elèta a 'l Senàt dla Repùblica in dla lista dla Léga Nòrd in dla circuscrisiòṅ Lumbardìa. Al 6 ad Maǵ dal 2008 la dvénta presidénta in secónda dal Senàt (da drē a Renato Schifani) ciapànd 161 vōt a favōr [1].
Da 'l Setémbar dal 2010 l'è la cumisària dla sesiòṅ emigliàna dal sò partî, insém a Angelo Alessandri, dòp la casàda via dal sò bras dèstar Marco Lusetti [2] [3]. La tèṅ c'l incàrag lè (e anc quél ad cumisària dla Lega in Ligûria) in fîṅ a 'l 1 ad Favràr dal 2012 quànd Roberto Calderoli al gh i tōś.
In dal Dicémbar dal 2010, al sò cumpurtamènt ad presidénta dal Senàt durànt al vōt di emendamènt dla rifórma Gelmini dla scōla al pòrta a la suspinsiòṅ dla sedùda p'r al masèl e al caśèṅ ch'a gh'éra gnû in cal mèntar p'r al fat ch'l'iva mis a i vōt un emendamènt che prima al cambiàva, pò al scrivéva ad nóṿ e pò al scanślàva un ùnic artìcul ad léǵ [4].
Culegamènt estéran
- (IT) La sò schéda uficiàla in sal sit dal Senàt
- (IT) La vutasiòṅ a rót ad còl dal ddl Gelmini sóta la presidénsa dla Rosy Mauro
Nòti
- ↑ Guèran, Berlusconi a la véd bèṅ. Calderoli «Mè, minìstar a surpréśa» repubblica.it, 6 ad Maǵ dal 2008
- ↑ Lega, Rosy Mauro e al caśèṅ in Emìglia: «a ciàm i segretàri pruvinciài» dire.it, 23 ad Setémbar dal 2010
- ↑ La Lega la fà piàsa pulìda dal diretìṿ dl'Emìglia, la Rosy Mauro la s śònta a Alessandri corriere.it, 14 ad Setémbar dal 2010
- ↑ Ddl Gelmini a 'l Senàt, 'l è un masèl. L'apruvasiòṅ la pōl spustàr-as a giuidè corriere.it, 21 ad Dicémbar dal 2010