Roberto Regazzi

Da Wikipedia.
Jump to navigation Jump to search
St artéccol qué l é scrétt in bulgnaiṡ Emigliàn
Bêrto Argâz quand l êra un pô pió żåuven

Bêrto Argâz (Roberto Regazzi, nèd ai 20 d'agåsst 1956 a Bulåggna, Itâglia) l é un inpurtànt liutèr dal dé d incû e studiåuṡ ch'l à arzvó la sô scôla al amstîr da Otéllo Bignâm.

Argâz al vîv es al lavåura a Bulåggna.


Al debótt al l à fât da ragazlàtt; al'etè ed 14 ân al prinzéppia a dères da fèr con pasiån par métter insàmm di strumént muṡichèl, a cal tänp masmamänt chitâr clâsichi, guidè da Alan Wilcox e Renato Scrollavezza a metè di ân Stanta.

Vgnó pió grand, l'ucaṡiån ed dvintèr un arlîv dla cà d Otéllo Bignâm al fó al mutîv par la sô deziṡiån ed dèr un tâi ai stûdi dl'Universitè ed Bulåggna (Fîṡica) par méttres a fèr l amstîr dal liutèr.

Afermè e cgnusó in tótt al månnd par la stupannda qualitè di sû strumént, l é stè presidänt ed dimónndi urganiżaziån specialiżè cómm l'Asuciaziån Européa di liutèr e di Fabricànt d archétt.

I sû viulén i én un eṡänpi da tgnîri drî pr utgnîr al sån itagliàn zarchè da tótt int i pajîṡ ed tótt al månnd.[1] Pôc prémma ch'ai arivéss al Dåumélla la sô produziån la taché a ispirères a Guarneri del Gesù, fén a arivèr a una sonoritè spetacolåuṡa. Al sô lavurîr al tén drî anc a quall ed Giuseppe Fiorini, Ansaldo Poggi e Augusto Pollastri (ch'l é cme dîr la scôla bulgnaiṡa mudêrna pió cgnusó). Int al 2006 la Câmra d Cumêrzi ed Bulåggna la i à conferé un'onorificiänza pr arcgnóssri al valåur dal sô lavurîr.[2]

Int al 2018 la Fundaziån Cologni al l à méss dänter int al Lîber d Ôr dal MAM (Màsster d Èrt e Amstîr), una spêzie ed Prèmi "Grammy" pr i lavurîr artigianèl.[3] Stra i musizéssta ch'i an dimónndi aprezè, ch'i an cunprè, i adrôven es i såṅnen i sû strumént ai é Boris Belkin[4], Franco Mezzena, Anne-Sophie Mutter[5], Ruggiero Ricci[6], Salvatore Greco, Giovanni Adamo, Franco Gulli, Anastasiya Petryshak, Sonia Slany, Riccardo Brengola, Uto Ughi, al Quartàtt ed Venêzia, Peter Fisher e tant èter.

La sô bibliotêca l'é una coleziån ed lîber preziûṡ, artéccuel e documént só i strumént muṡichèl, cunsidrè un pèz ónnic a livèl mondièl[7].

L à fât pèrt dla giurî in tant cuncûrs par liutèr, cunpraiṡ quall di dîṡ Cuncûrs Internazionèl dla Violin Society of America a Carlisle, Pensylvania (1992), al Freiburg Baden-Wurttemberg Internatiolaner Geigenbauwettbewerb Jacobus Stainer (1996), al quént Cuncåurs ed Liuterî ed Baveno, al secånnd Cuncåurs d Santa Maria dla naiv ed Pisogne e l inpurtànt 10° e 14° (int al 2021 in qualitè ed Presidänt dla Giurî) Henryk Wienawsky Violin-Making Competition, la pió antîga manifestaziån al månnd ed ste gèner.

A partîr dai ân Stanta, fén ala fén di an Utanta, l à anc realiżè dimónndi chitâr clâsichi da cunzêrt, masmamänt realiżè con palisànder braṡigliàn selezionè ed prémma qualitè, con spezièl zaider råss dla Vargéggna e abaid itagliàn o americàn. Fén da quand l à prinzipiè a lavurèr, tótt i sû strumént i én marchiè con al fèr es i an al sô cartlén.

L à scrétt di lîber, tgnó däl conferänz in tótt al månnd es l à urganiżè di incónter culturèl in vatta ala sô èrt e profesiån, sanper tratànd la liuterî dla zitè dal sô côr. Argâz l é al prémm liutèr bulgnaiṡ numinè tstimòni ufizièl dl Artigianèt par la Costruziån ed Strumént Muṡichèl al'Expo "Bologna 2010" ed Shangai.

Int al stass perîod l à anc creè e ṡvilupè al "wiihang", ch'l é una spêzie ed "handpan" preparè ch'l adrôva la tecnologî arâż infraróss par psair èser méss in còpia con un sintetiżadåur preparè apòsta.[8]

Riferimént[modifica | mudéfica la surzéia]

  1. Marina Amaduzzi, Il Signore dei Violini int al: Repubblica, 21 Dec 2005, p.15
  2. http://www.bo.camcom.it/intranet/Comunicati/Anno-2006/comunicato-stampa-premiazione.doc_cvt.htm Camera di Commercio di Bologna, opûr https://archive.is/20070808185659/http://www.bo.camcom.it/intranet/Comunicati/Anno-2006/comunicato-stampa-premiazione.doc_cvt.htm (2007-08-08), opûr vàdd: Patrizia Zini, Un premio alla creatività bolognese, int al: Bologna Economica, Luglio-Agosto 2006, p.11
  3. http://www.maestrodartemestiere.it/it/libro-d-oro/2018/roberto-regazzi
  4. http://www.sienafree.it/index.php?option=com_content&view=article&id=13166:boris-belkin-e-la-sofia-festival-orchestra-diretta-da-alipi-naydenov-in-concerto-a-siena&catid=256:eventi-e-spettacoli&Itemid=522 ; http://mialfombravoladora.blogspot.com/2009/11/52-boris-belkin-con-la-real-orquesta.html
  5. La Magie du Bois, Florenus Edizioni - Dynamic 2005
  6. The Legacy of Cremona, Genova 2001, Dynamic
  7. Franco Basile, Il liutaio che dà forma alle note, int al: Resto del Carlino, Feb 23, 2006, p.9 e "Collectors' corner", int al: The Strad, May 2010, p. 53
  8. (IT)Nicolò Corsini, "Creare e Ricreare: Intervista a Roberto Regazzi, Mº Liutaio", int al Liuteria Elettronica e nuovi gesti sonori: il caso delle Ondes Martenot
    • (IT) Catalogo dell'Artigianato in Italia, Milano, 1984, Giorgio Mondadori
    • (IT) Chitarra: storia, miti, immagini - Bologna, 4-15 aprile 1987 - Sala Ercole in Palazzo d'Accursio, Bologna, 1987, AICS
    • (DE) Drescher Thomas; Die Geigen und Lautenmacher vom Mittelalter bis zur Gegenwart; Schneider, Tutzig 1990; p. 502.
    • (IT)Gabriella Gallerani, "Liuteria. Arte e passione. Intervista a un giovane liutaio nella sua bottega" int al La chitarra, storia mito e immagini, Milano, 1987, Fabbri, pp. 58–64
    • (IT)Gioli, Sergio, "Un amore di violino" int al Resto del Carlino, Oct. 6, 1990
    • (DE)Heimsoeth, Bettina, "Europäischer Zusammen-Klang" (Handwerk und Europa), Kammer Aktuell, Zeitung der Handwerskammer Düsseldorf, 19. August, 1999, nummer 16, p. 15
    • (IT)Gruppo Liutai e Archettai Professionisti; ALI, Associazione Liutaria Italiana. Cremona 1994, pp. 76–77
    • (IT)Guida all'Artigianato Artistico nella Provincia di Bologna, Bologna, 1990
    • (IT)Il suono di Bologna oggi. Gruppo Liuteria Bolognese, Bologna 2003, GLB, pp. 28–29
    • (IT)Secondo Concorso Nazionale di Liuteria Città di Pisogne, cat. Aug., 2008
    • (IT)Monica Mascheroni, L'Artigianato Italiano - Ferro battuto, legno intagliato, vetri piombati, terracotta, maiolica, mosaico, pizzi, merletti, strumenti musicali, Milano 1986, Mondadori
    • (IT)Silvia Montevecchi, Realizzare i sogni. Storie di donne e uomini felici
    • (EN)Nicolini Gualtiero, Violinmakers in Italy - From the 19th century to the present, Ozzano dell'Emilia, 2008
    • (IT)Nicolini Gualtiero, Liutai italiani di ieri e di oggi, Cremona, 1991
    • (EN)Christobel Kent, "Craft, science, magic" in Bologna For Connoisseurs magazine, 2013, #4 Autumn, pp. 40–47: an interview with Roberto Regazzi.
    • (EN)The Magic of Wood; Bologna-Genova 2005, Florenus & Dynamic: an interview by Linda Johnston.