Provetta d'amore

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg The Babymakers
Provetta d'amore
Provetta d'amore.png
La Marzocchi e la Clifford in na figùra dal film
Pruvéta 'd amōr
2012
Regia: Jay Chandrasekhar
Scritùr: Peter Gaulke • Gerry Swallow
Atùr: Paul SchneiderOlivia MunnNat Faxon
Kevin HeffernanAisha TylerConstance Zimmer
Müsica: Edward Shearmur
Lengua: Ingléś
Dürä dal film: 98 minüt
Nasiòṅ: Stat Unî


«
Lē la sà cuś la vōl... lò al sà qvél ch'al gh'à da far.»
(Tagline dal film)


Provetta d'amore (Pruvéta 'd amōr) l'è na cumèdia dal 2012 ad Jay Chandrasekhar giràda in Califòrgna.

In di cìnema di Stat Unî 'l à fat sù sincmìla-duśènt dòlar.

Sunt

Tommy Macklin (Paul Schneider) e sò mujér Audrey (Olivia Munn) i èṅ na còpia śōvna ch'i decìd'n ad far un fiōl dòp tri an insém par ślargàr la famìja ma dòp nóṿ méś ad tintatìṿ a n gh'è gnint da far e 'l putèṅ al n riva briśa. Dòp avér pruâ di rimèdi naturài cuma 'l pavrunsèṅ o di impàc a i maròṅ, i dū i decìdan 'd andàr a far-as védar da 'n dutōr, prima però Tommy al gh'à da far na śburàda par gl'anàlìśi. A 'l uśdàł al n gh la cava minga parchè in dal film pòran ch'i gh'aṅ mis sù par jutàr-al a salta fóra 'n cavàl e pò a gh'è la dutōra fóra da 'l us ch'la spéta e a lò a gh vîṅ l'angùstia. Al próa a far-'l a cà sua ma méntar 'l è a lèt ch'al s fà na pugnéta i sònan qvéli di Testimòṅ ad Géuva (Carrie Clifford e Sophia Marzocchi) ch'i n vànan via gnanc s'a t li cóp. Tommy al gh'à da lasàr pèrdar p'r andàr a vèrar. Finalmènt 'l óm al gh la cava a impinìr da pruvéta e a purtàr-la in laburatòri anc se lung la via al śbuśìs na rōda dla màchina. Purtròp par lò al prubléma 'l è 'l suo, i sò spermàtuzoo i pàr'n imbariàg.

Durànt na séna c'n i genitōr dl’Audrey, par difénd'r al sò argój, Tommy al diś che lò 'l è a pòst parchè 'l anèl ad fidansamènt par sò mujér al s 'l è cumprâ faghénd-as dal pugnéti par vint stmani e vindénd pò la sò śbòra a na banca dla scménsa p'r utànta-sinc dòlar a cōlp, dònca 'l sèntar mèdag al n psiva minga dar di bèsi p'r avér in cambi dal lìquid lòfi. A n 'l is mai dit! L’Audrey la s ufénd dimóndi e 'l sò matrimòni 'l è a risć.

Tommy al decìd acsè 'd andàr a sintìr a la banca dla scménsa se par caś a gh sia vansâ quèl e difàti n'ultma pruvéta la gh'è incóra ma l'è stada péna vindùda a na còpia 'd fnòć ch'i vōl'n avér un putèṅ cun na màd'r in afìt parchè òṅ al gh'à di prubléma 'd caràtar e 'l è méj a n 'vér-ag mia 'n fiōl cumpàgn e c'l àtar al gh'à i spermàtuzoo pìgar cuma qvéi ad Tommy. In na quàlc manéra chi lò al gh la cava a dascórar sèg e al gh admànda 'd avér indrē la pruvéta. Òṅ al sarév anc 'd acòrd ma in cambi al vōl far-'g al cûl. Giùst parchè 'l è bòṅ e 'l vōl vgnir-'g incóntar 'l è dispunìbil a 'l lìmit a far-as far al suo.

Tommy, su cunsìli di sò amìg Wade (Kevin Heffernan) e ad Zig-Zag (Nat Faxon), al decìd invéci 'd andàr a śgranfgnàr la pruvéta ch'la s cata incóra in dal sèntar mèdag e par far-al al dmanda ajùt a 'n indiàṅ mafióś, Ron Jon (Jay Chandrasekhar). Ma sò mujér l'à in cal méntar cambiâ idéa parchè la s è misa in tèsta 'd adutàr un putèṅ cinéś ma par far-al i gh vōlan sinc-mila dòlar e Tommy al i à spéś par dar-i a Ron Jon.

Culegamènt estéran