Presunto innocente
|
C'l artìcul chè 'l è scrit in
Miranduléś |
 Presunto innocente
| ||
 Juliá, la Bedelia e Ford in na figùra dal film | ||
| Preśùnt inusènt 1990 | ||
|---|---|---|
| Regìa: Alan J. Pakula | ||
| Scritōr: Scott Turow • Frank Pierson • Alan J. Pakula | ||
| Atōr: Harrison Ford • Brian Dennehy • Raúl Juliá Bonnie Bedelia • Greta Scacchi • Paul Winfield John Spencer • Joe Grifasi • Tom Mardirosian | ||
| Müsica: John Williams | ||
| Léngua: Ingléś | ||
| Dürä dal film: 122 minüt | ||
| Nasiōṅ: Stat Unî | ||
Presunto innocente (Preśùnt inusènt) 'l è 'n śal prucesuàł americàṅ dal 1990 'd Alan J. Pakula trat da 'n rumànś ad Scott Turow.
Girâ c'n un budget ad vint migliòṅ ad dòlar, al film al 'n à pò fat sù da piò ad sènt-vint-i-òṅ.
Sunt
Rozat K. Sabich dit Rusty (Harrison Ford) 'l è 'l vice-prucuradōr distretuàł dla cuntèa 'd Kindle e 'l lavóra insém a 'l sò cap Raymond Horgan (Brian Dennehy). 'L è spuśâ cun la Barbara (Bonnie Bedelia) e 'l gh'à 'n fiōl pìcul.
Un dè na sò culéga, la Carolyn Polhemus (Greta Scacchi), la vîṅ catàda mòrta masàda in cà sua e ligàda cuma s'la fus stada prima viulentàda anc parchè i gh càtan dla śbòra dèntar. Chi lē, dasfrutànd al fat 'd èsar na bèla dóna, la s è sèmpar fata strada vrénd al gambi cun tut, anc cun Rusty dvintànd la sò amànta prima 'd dascargàr-al quànd l'iva capî che lò al n gh tgniva minga a far caréra.
Raymond, ch'al s l'éra fata anc lò quànd lē la gh'iva biśógn 'd un quàlc cuć, al dà 'l incàr'g ad purtàr avànti 'l caś a Rusty ma quànd al detective ch'al fà gl'indàśìn, Harold Greer (Tucker Smallwood), al s rénd cònt 'd un tràfic telefònig suspèt fra 'l nùmar 'd Rusty e qvél ad cà dla Carolyn, al vice-prucuradōr 'l al sustituìs c'n al sò amìg pulisiòt Dan Lipranzer (John Spencer). In tut al manéri cal segrét lè a salta fóra listés, inólt'r a s véd ch'na sò didàda l'éra finìda su 'n bicér in cà dla vitma, ch'la śbòra catàda in dal sò còrp l'è cumpatìbila c'n al sò sangṿ e ch'in d'l apartamènt dla dóna a gh'è dal trasi di gat di tapē di Sabich.
Rusty al finìs a prucès, diféś da 'l avucàt Alejandro Stern dit Sandy (Raúl Juliá), méntar l'acùśa l'è purtàda avànti p'r al prucuradōr distretuàł nóṿ, Nico Della Guardia (Tom Mardirosian), e par Tommy Molto (Joe Grifasi), un sò èx culéga. Al giùdas invéci 'l è Larren Lyttle (Paul Winfield).
Rusty e Stern i tìran fóra 'n dossier misterióś dla Carolyn, ch'a n s cata piò, in du 'n criminàł, Leon Wells (Leland Gantt), 'l iva scampâ 'l prucés parchè Lyttle, ch'l andàva a lèt cun la Carolyn, 'l iva archiviâ incòsa dòp avér ciapâ na tangìnt par saràr 'n òć. Durànt al prucès a salta però fóra ch'al bicér al n s cata piò, dònca la próa dla didàda la n sarév minga piò bòna, e ch'la Carolyn la s éra fata ligàr al tubi dònca a n gh'iva minga sèns ch'la druìs na créma par dasfàr la śbòra, la śburadùra analiśàda l'éra difàti mòrta, a gh'è quèl ch'a traśa cuma s'a fus na viulénsa sesuàla inśgnàda ad art. P'r a n andàr minga in a risć ad dascórar dal dossier “Wells”, al giùdas Lyttle al sèra lè 'l prucès.
Rusty al pōl turnàr a la sò vita 'd tut i dè e 'l vîṅ a savēr ch'a purtàr via 'l bicér 'l éra stâ Lipranzer. Chi lò al n sà minga se lò 'l è culpévul dabòṅ, in tut al manéri qvél ch'l è sucès 'l è ch'l'è mòrta na vacàsa e basta. Sōl quànd Rusty al tórna a cà, catànd na martlìna maciàda 'd sangṿ cun di cavìi biónd tacâ insìma cuma qvéi dla Polhemus, a salta fóra la véra e 'l óm al capìs incòsa, anc ch'la śbòra l'éra pròpria la sua, tgnuda dacàt ślada dònca tuta dasfàta, la créma la n gh intràva gnint.