Porcile
|
C'l artìcul chè 'l è scrit in
Miranduléś |
 Porcile
| ||
 Lionello, Ferreri e Tognazzi in na figùra dal film | ||
| Pursìl 1969 | ||
|---|---|---|
| Regìa: Pier Paolo Pasolini | ||
| Scritōr: Pier Paolo Pasolini | ||
| Atōr: Jean-Pierre Léaud • Pierre Clémenti Alberto Lionello • Ugo Tognazzi • Marco Ferreri Ninetto Davoli • Margarita Lozano • Franco Citti Anne Wiazemsky • Luigi Barbini • Sergio Elia | ||
| Müsica: Benedetto Ghiglia | ||
| Léngua: Itagliàṅ | ||
| Dürä dal film: 98 minüt | ||
| Nasiōṅ: Itàglia • Frància | ||
Porcile (Pursìl) 'l è 'n film dramàtic dal 1969 ad Pier Paolo Pasolini ch'al 'l à anc scrit jutâ par Sergio Citti. 'L è divìś in dū epiśòdi misćiâ insém, qvél ad Julian e qvél dal canìbal.
Sunt
Epiśòdi 'd Julian
In dla sò vila in Germàgna Julian Klotz (Jean-Pierre Léaud) al n in vōl pròpria savēr ad spuśàr l’Ida (Anne Wiazemsky), cum al vrév invéci sò pàdar (Alberto Lionello) ch'al fà 'l industriàł, anc parchè a 'l ragàs a gh piàś gusàr in dal ciûś c'n i sò nimài.
Un dè i rìvan lè dū óm par dascórar c'n al sgnōr Klotz, Hans Günther (Marco Ferreri) e 'l sgnōr Herdhitze (Ugo Tognazzi). Chi lò, ch'al vrév dvintàr sòci d'l industriàł, al gh cònta 'n epiśòdi dla secónda guèra mundiàla quànd lò 'l à fat i bèsi cavànd via 'l òr da i dènt di cadàvar di ebrèj. Quànd Klotz al gh diś ad nò, Herdhitze al tira fóra la stòria dal visi 'd sò fiōl. Custrét malvluntéra a firmàr 'l acòrd, al sgnōr Klotz al n sà minga ch'in cal méntar Julian 'l è andâ in dal pursìl a far-as magnàr da i sò gugiōi.
Epiśòdi dal canìbal
In dla Sicìglia dal XVI sécul, in dal vulcàṅ Ètna, 'n óm (Pierre Clémenti) al gira da par lò magnànd qvél ch'al cata in gir: insèt, luśèrtli e via dascurénd. Stuf ad magnàr sōl dla carna dal bèsti, chi lò un dè al masa 'n suldâ (Luigi Barbini) ch'al gh dava la casa, al gh taja la tèsta e pò 'l magna 'l sò còrp rustî.
In séguit al canìbal al dvènta amìg 'd un śōvan (Franco Citti) ch'al gh'à 'n visi cumpàgn a 'l suo ma par lōr i dè i èṅ cuntâ parchè 'n tisi ciamâ Maracchione (Ninetto Davoli) al i ciàpa cun na trapla e pò al i fà ligàr atàc a di pai p'r èsar magnâ da i caṅ ch'i pàsan da lè.