Pippa Middleton

Da Wikipedia.

C'l artìcul chè 'l è scrit in Miranduléś Emiliàn

La Pippa Middleton tòlta śò in dal 2013
La Pippa durànt al matrimòni ad sò surèla


«
Kate l'éra spléndida durànt la serimògna, ma a-j-ò pinsâ che Pippa la butìs fóra stîl da tut i sò pōr.»
(Dichiarasiòṅ dla cantànta Lady Gaga in di cunfrònt ad Pippa)


La Philippa Charlotte Middleton, cgnusùda in tut al mónd cuma «Pippa», l'è na ragasōla che ad mistēr la mét in pē di matrimòni par cònt ad chi àtar. L'è dvintàda famóśa parchè sò surèla Catherine l'à spuśâ al 29 'd Avrìl dal 2011 al prìnsip 'd Inghiltèra William dvintànd duchésa ad Cambridge.

Fióla ad Michael Francis Middleton e Carol Elisabeth Goldsmith (tut i du i lavuràvan in dla cumpagnìa di aparèć British Airways), l'è nada a Reading in dal Régn Unî al 6 ad Setémbar dal 1983 e la gh'à anc un fradèl, James.

Subìt dòp al spuśalìsi dla surèla, al fundadōr dla Vivid Entertainment Steven Hirsch al gh śibìs 5 migliòṅ ad dòlar p'r èsar tòlta śò in un film pòran, dand-ag però la manéra ad sarnìr-as al masć ch'la vōl lē[1].

Invéci la Sony la gh dèdica di fumét par dar lùstar a 'l śōg vìddeo dla PlayStation ciamâ Infamous 2. Insém a lē i figùran anc la Cheryl Cole, e al cantànti Beyoncé e Lady Gaga[2].

Al sò scutmàj 'l è la śmudandàda (Commando in ingléś) e al gh'è stâ dâ da 'l fradèl rós ad William, Harry, 'l ùnic put dla cà reàla ch'al gh'arév butâ i òć adòs[3].

Al sò culét 'l è dvintâ adès un mudèl in di Stat Unî, cun al dóni ch'i vaṅ da i cirùsic plàstic par far-as far un da drē cum al suo, ch'l à tòlt al pòst ad quéi ad Jennifer Lopez, Beyoncé, Serena Williams e Kim Kardashian[4]. Anc la sò fisa ad magnàr dal sushi l'à fat scóla[5].

Bcada p'r i paparàś cun adòs na stanèla curta a baśàr al sò muróś Alex Loudon, ex śugadōr ad cricket, fóra dal Park Plaza Hotel dòp 'n evènt ad beneficénsa tgnû sàbat 'd sira prim 'd Utóbar dal 2011, la vèṅ tòlta śò mèntar la próa a quaciàr-as la sò pèla ad purtugàl ch'la gh'à in dal còsi[6]. A n è minga la prima vòlta che i giurnài scandalìstic i gh tìnan a drē: soquànt méś prima, al tabloid tedésc dla Bild 'l iva fat gnir fóra una sò foto in dua i sa vdìvan al sò mudàndi da 'd sóta a 'l vistî[7]. Tant par dir-'n una, la sò famìja l'à fat tōr via da di giurnài dal Régn Unî dal foto 'd un sò viàś a Ibìśa in dua l'éra cun al téti ad fóra.

Nòti