Pietro Vignali
|
C'l artìcul chè 'l è scrit in
Miranduléś |
Pietro Vignali (Parma, 22 ad Maǵ dal 1968) 'l è 'n pulìtic parmśàṅ ad sèntar-dèstra, sìndic dla sità ad Parma da 'l 2007 a 'l 2011.
Biugrafìa
Laureâ in Ecunumìa e Cumèrs, 'l è iscrìt a 'l alb d'l Órdan di Dutōr Cumercialìsta. A 24 an, dòp avér ciapâ la laùrea in dla sò sità, al dvénta prima cumisàri pruvinciàl dal Partî Pupulàr Itagliàṅ (PPI), pò segretàri pruvinciàl di Cristiàṅ Demucràtic Unî (CDU), e finalmènt espunènt dla lista cìvica Siviltà Parmśàna.
Cuma cunsiliér pruvinsiàł dl'upuśisiòṅ, in di an dal 1995 a 'l 1999, al tîṅ a drē specialmènt a 'l ambînt, a gl'infrastrutùri e a 'l śvilùp ecunòmic. Durànt al guèran cumunàł dal sìndic Elvio Ubaldi, tri an da 'l 1998 a 'l 2001, 'l à laurâ a 'l ambînt e pò 'l è dvintâ asesōr cumunàł a la Mubilità e Ambînt.
In dal 2007 'l è dvintâ sìndic dla sìta ducàla guidànd na cualisiòṅ ad sèntar-dèstra, baténd a 'l balutàǵ Alfredo Peri c'n al 56,57% di vōt. Al sò mòt 'l è stâ «Par mè al prim sitadìn at sē tè»[1].
Al minìstar dla Pùblica Aministrasiòṅ e dl'Inuvasiòṅ Renato Brunetta, durànt 'n intervènt a Parma in d'l Avrìl dal 2009 par la spianàda dal servìsi emoticon (facìni ch'i rìdan o ch'i piànśan, sarnìdi da i utènt, ch'i sarvìsan par miśuràr al gradimènt di servìsi pùblic), al diś ad lò «Al mè sógn 'l è quél che tuti gl'aministrasiòṅ cumunàli i sìan cuma qvéla ad Parma».
In dal Luj dal 2011 Vignali al vîṅ cundanâ par la cōrt di cònt a dar indrē al cumùṅ ad Pärma da piò ad 23.000 euro parchè al s éra fat pagàr cun di bèsi pùblic la sò asicurasiòṅ cónt'r i śbali aministratìṿ[2]. Al 28 ad Setémbar dal 2011, dòp 'l arèst dal sò asesōr Giovanni Paolo Bernini e àtar tri, Vignali al dà 'l dimisiòṅ, dgénd però ch'al s in và da galantóm[3]. A 'l sò pòst la riva al cumisàri prefetìsi dal guèran Anna Maria Cancellieri, ch'l'iva fat la stésa ròba soquànt méś prima anc a Bulógna[4]. Déś an dòp però i giùdas i dìśan ch'i s éran śbaliâ su 'l sò cònt[5].
Culegamènt estéran
Nòti
- ↑ Pärma a t ringràsi, adès, tut insém, andém avànti ilprimocittadinoseitu.it
- ↑ Pòlisi asicuratìvi fóra dla léǵ, cundanâ Vignali e Ubaldi repubblica.it, 13 ad Luj dal 2011
- ↑ Tangînt, al s dimét al sìndic ad Parma corriere.it, 28 ad Setémbar dal 2011
- ↑ Anna Maria Cancellieri l'è al nóṿ cumisàri prefetìsi a Parma ilfattoquotidiano.it, 20 'd Utóbar dal 2011
- ↑ 'L à cauśâ 'l dimisiòṅ dal sìndig sindaco Vignali 'd Parma, dòp 10 an: “A s sém śbaliâ” Il Riformista, 30 ad Śugn dal 2020