Paradòs dl'àrea sparìda

 Miranduléś

C'l artìcul chè 'l è scrit in Miranduléś

Animasiòṅ dal paradòs

Al “paradòs dl'àrea sparìda” (Missing square puzzle in ingléś) 'l è 'n paradòs geumètric strulgâ in dal 1953 da 'n prestigiadōr ad New York ciamâ Paul Curry.

Descrisiòṅ dal paradòs

Fra i dū triàngul a gh cala 'n cunsèṅ

Fém un diségn 'd un triàngul retàngul “A” cun na baś lunga 13 e n'altésa 'd 5. A cal punt chè dividém-'l in quàtar pès culurâ e cambiém-'g ad pòst par mét'r insém 'n àtar triàngul retàngul “B”.

A cal punt lè a salta fóra ch'a gh cala 'n quadartèṅ vōd fra i pès śal e vérd in figùra. A s trata 'd un quèl impusìbil parchè al secónd triàngul, creâ parténd da 'l prim, al gh'à incóra na baś lunga 13 e n'altésa 'd 5.

Spiegasiòṅ

La spiegasiòṅ dal paradòs l'è data da 'l fat ch'a s trata dn'iluśiòṅ parchè la figùra “A” la n'è minga 'n triàngul retàngul ma 'n quadarlàtar ch'al gh'à 'n sćiànc a livèl dl'iputenùśa fra la figùra celèsta e qvéla rósa. La prima figùra l'è còncava méntar la secónda l'è cunvèsa dònca l'àrea ch'in dal figùra “B” a gh'è da piò in élt la s pèrd in dal bas.