Oliver & Company
|
C'l artìcul chè 'l è scrit in
Miranduléś |
 Oliver & Company | ||
| Oliver & Company | ||
 Oliver e Dodger in na figùra dal film | ||
| Oliver e cumpagnìa 1988 | ||
|---|---|---|
| Scritōr: Charles Dickens | ||
| Regìa: George Scribner | ||
| Senegiadùra: Vance Gerry • Pete Young • Joe Ranft Jim Mitchell • Dave Michener • Leon Joosen Mike Gabriel • Michael Cedeno • Gary Trousdale Kevin Lima • Roger Allers • Kirk Wise • Chris Bailey | ||
| Personâǵ: Oliver • Dodger • Fagin • Georgette Jennifer Foxworth • Tito • Francis • Einstein • Sikes Rita • Roscoe • Desoto • Winston • Vèć Louie | ||
| Dupiadōr originêl: Joey Lawrence • Billy Joel Dom DeLuise • Natalie Gregory • Richard Mulligan Robert Loggia • Cheech Marin • Bette Midler Roscoe Lee Browne • Sheryl Lee Ralph | ||
| Mùśica: J.A.C. Redford | ||
| Durèda dal cartòun: 73 minût | ||
| Lengua: Ingléś | ||
| Nasiòun/Paēś: Stat Unî | ||
Oliver & Company (ciamâ acsè anca in itagliàn, a dir "Oliver e cumpagnìa") 'l è 'n cartòṅ animâ americàṅ dal 1988 disgnâ e prodòt par la Walt Disney Feature Animation, al 27śum Clàsic Disney dla série.
Al cartòṅ, ispirâ a 'l rumànś Oliver Twist ad Charles Dickens, 'l è stâ bòṅ ad far sù da piò ad sènt-vint migliòṅ ad dòlar dòp ès'r-an custâ trènt'òṅ.
Sunt
In na strada 'd Manhattan, qualchidòṅ al mét fóra da 'n negòsi ch'al vénd dal bèsti un scatlòṅ grôs cun dèntar soquànt gatèṅ, sprand che na quàlca bòṅànma al i tóga sèg in adusiòṅ. A sucéd pròpria acsè ma a gh'è 'n gat ch'l armàgn lè da par lò, Oliver. Chi lò, ch'al gh'à fam, al và in gir a dmandàr da magnàr e a 'n sèrt punt 'l incrósa un sèrt Dodger, un fox terrier fùrub e cariśmàtic, ch'l al pòrta sèg in dal sò cumpagnìa 'd caṅ randàś.
In dal grup a gh'è 'l chihuahua Tito ch'al dascór cun 'n asènt spagnōl, pìcul ma sèmpar prònt quànd a gh'è da cumbàtar, al chiēt alàṅ Einstein, la saluki Rita, dōlsa ma decìśa, e Francis, un bulldog cun la pasiòṅ par 'l art e 'l teàtar. Tut cal bèsti lè i vìv'n insém a Fagin, un barbòṅ bòṅ cum al paṅ ma spaurìś e anc piutòst maldèstar.
Esénd sèmp'r in buléta, Fagin 'l è stâ custrét a dmandàr di bèsi in prèst da 'n strusèṅ ciamâ Sikes, ch'al gh'à sèg dū cagnàs dobermann, Roscoe e Desoto, nemìg dla cumpagnìa 'd Dodger. Adès però Sikes al i vōl indrē e 'l dà tri dè a Fagin par catàr-i o sinò al gh la farà pagàr, sénsa però dascórar ciàr.
Al grup di caṅ 'd Oliver al próa a dar-ag na maṅ inśgnànd-'s a far dal rubarìi in gir. Méntar Francis al fà finta 'd èsar stâ mis sóta a la limousine dla famìja Foxworth, gint rica dla sità, Oliver al finìs fra i bras dla Jenny, na putìna dimóndi gustóśa ch'l'è drē a spetàr ch'i suo i turnìsan da 'n viàś in Európa. Chi lē la decìd ad purtàr-'s a cà al gat par far-ag cumpagnìa.
A cà di Foxworth Oliver al cgnóś cla malmustóśa e pîna 'd lē barbunsìna 'd famìja, la Georgette, ch'la taca a èsar gelóśa 'd lò. Quànd la banda 'd Fagin al gh la cava a far-al turnàr indrē, Oliver al diś lōr ch'adès 'l à tacâ na vita nóva par mèrit dla Jenny e ch'la putìna la gh'à biśógn ad lò.
I persunàǵ
- Oliver (dupiâ da Joey Lawrence)
- Dodger (dupiâ da Billy Joel)
- Fagin (dupiâ da Dom DeLuise)
- Georgette (dupiâ da Bette Midler)
- Jennifer Foxworth (dupiâ da Natalie Gregory)
- Tito (dupiâ da Cheech Marin)
- Francis (dupiâ da Roscoe Lee Browne)
- Einstein (dupiâ da Richard Mulligan)
- Sikes (dupiâ da Robert Loggia)
- Rita (dupiâ da Sheryl Lee Ralph)
- Roscoe (dupiâ da Taurean Blacque)
- Desoto (dupiâ da Carl Weintraub)
- Winston (dupiâ da William Glover)
- Vèć Louie (dupiâ da Frank Welker)