Occhio malocchio prezzemolo e finocchio

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Occhio malocchio
prezzemolo e finocchio
Occhio malocchio prezzemolo e finocchio.png
La Borboni e Johnny Dorelli in na figùra dal film
Òć malòć parsémul e fnòć
1983
Regìa: Sergio Martino
Scritōr: Romolo Guerrieri • Bruno Corbucci
Franco Bucceri • Sergio Martino • Roberto Leoni
Mario Amendola • Franco Verrucci
Atōr: Johnny DorelliLino BanfiPaola Borboni
GegiaMilena VukoticRenzo Montagnani
Janet AgrenSilvanAdriana Russo
Mario ScacciaMario BregaAnna Kanakis
Müsica: Guido De Angelis • Maurizio De Angelis
Léngua: Itagliàṅ
Dürä dal film: 113 minüt
Nasiōṅ: Itàglia


«
Òć malòć parsémul e fnòć, ego me baptizzo cónt'r al malòć. Puh! Puh! E c'n al pavrunsèṅ e 'n pôc 'd insalàta a m prutèś la Madóna dl'Incurunàda; cun 'l òli, al sâł e 'l aśē a m prutèś la Madóna di Stèrp; córrr'n ad bóv, lat scremâ, prutèś cla cà chè da 'l inuminâ.»


Occhio malocchio prezzemolo e finocchio (Òć malòć parsémul e fnòć) l'è na cumèdia a epiśòdi dal 1983 ad Sergio Martino ch'la dascór d'l ucultìśum in na manéra da rìdar. I dū prutagunìsta i èṅ Lino Banfi e Johnny Dorelli.

In Purtugàl 'l è vgnû fóra c'n al tìtul ad “O Teu Olho é a Minha Desgraça”.

Sunt

Prim epiśòdi: Al pēl dla daśgràsia

Al pugliéś Altomare Secca (Lino Banfi) al gh'à 'n negòsi ch'al vénd di televiśōr e di letrudumèstic in gènar. 'L è spuśâ cun la Giovanna (Milena Vukotic) ch'la pénsa sōl a 'l soap opera e al gh'à na fiōla, la Mariella (Gegia), ch'la gh'à i òć sōl p'r al sò muróś ciciòṅ Carluccio (Andrea Azzarito) che però sò pàd'r al n s pōl minga cumpatìr. In cà a far i fat a gh'è na dóna 'd servìsi napulitàna, la Jenny (Elisa Kadigia Bove).

Altomare 'l è sòlit andàr in palèstra in dua a gh'è n'insgnànta ad ginàstica ch'a gh piàś dimóndi, l'americàna Helen (Janet Agren). Un dè a riva in dal sò palàs 'n óm ciamâ Corinto Marchialla (Mario Scaccia) cun la sò sgnōra Ludovica (Dagmar Lassander) parchè 'l à cumprâ 'l apartamènt davśèṅ a 'l suo. Da cal mumènt lè p'r Altomare i tàc'n i guàj parchè al patìs dal daśgràsi una adrē a cl'atra tant ch'al s fà l'idéa ch'a sia Corinto al respunsàbil.

Par far-as jutàr al và a sintìr un parēr da 'n mâg santòṅ (Franco Javarone) ch'al gh diś che par paràr via la sfurtùna al gh'à da tiràr via 'n pēl grôs e dûr da 'l còrp ad Corinto. Altomare al ciàma acsè a séna i sò vśèṅ ad cà e pò al dà la śdòrmia a Marchialla mènt'r invéci la Ludovica la tōś un stimulànt indiàṅ ad Carluccio ch'al la fà dvintàr na purcùsa 'd prim órdan. Altomare al próa a cavàr-al śò par sćiancàr-ag via i pēi ma al gh'à da far i cònt cun na Ludovica bujènta e anc cun la Jenny ch'l'è vgnuda lè par dar-'g indrē al sò bursèl ch'l iva daśmindgâ da lē.

Secónd epiśòdi: Al mâg

Gaspare Canestrari dit "Le Grand Gaspar" (Johnny Dorelli) 'l è 'n iluśiunìsta 'd quàtar sòld ch'al fà fadìga a muciàr sù di bèsi abàsta par tiràr avànti tant che lò e sò mujér, la Iole (Adriana Russo), i èṅ custrét a vìv'r insém a sò cugnâ Alberigo (Mario Brega) ch'al gh'à anc un brut caràtar. Gaspare al próa a dmandàr ajùt a 'l sò impreśàri, al cavalér Aldovrandi (Renzo Montagnani), ma chi lò al pénsa sōl a gusàr da spés na quàlc rója.

Un dè la marchéśa Del Querceto (Paola Borboni), na dóna vècia e śbucàda pîna 'd bèsi e 'd cà, la 'l fà ciamàr p'r al majurdòm Artemio (Luigi Leoni) e la gh diś 'd èsar na stria ch'la gh'à da piò ad tarśènt an e ch'la gh'à di putēr màgic da quànd l'è stada inculàda da 'l Diàv'l in parsòna. La vècia la gh i vōl pasàr a lò e la gh fà bévar un bicér ad pisa 'd cunèṅ in dua lē la gh'à anc spudâ dèntar, pò la gh śibìs un lìbar ad striarìa. In cambi la gh admànda se par piaśēr al gh pōr purtàr più avànti un ślâ a 'l pistàc.

Adès Gaspare 'l è dvintâ un mâg dabòṅ e la sò vita la pōl finalmènt cambiàr in méj. Aldrovandi al sènt parfùm ad bèsi e al mét in pē na sfida c'n al mâg Silvan (Silvan).

Culegamènt estéran