North Country - Storia di Josey
|
C'l artìcul chè 'l è scrit in
Miranduléś |
 North Country
| ||
| North Country - Storia di Josey | ||
 La Charlize Theron in na figùra dal film | ||
| Paéś dal Nòrd - Storia dla Josey 2005 | ||
|---|---|---|
| Regìa: Niki Caro | ||
| Scritōr: Michael Seitzman Clara Bingham • Laura Leedy | ||
| Atōr: Charlize Theron • Frances McDormand Woody Harrelson • Richard Jenkins • Sissy Spacek Sean Bean • Jeremy Renner • Michelle Monaghan | ||
| Müsica: Gustavo Santaolalla | ||
| Léngua: Ingléś | ||
| Dürä dal film: 126 minüt | ||
| Nasiōṅ: Stat Unî | ||
North Country - Storia di Josey (Paéś dal Nòrd - Storia dla Josey) 'l è 'n film dramàtic e biugràfic americàṅ dal 2005 dla Niki Caro trat da 'n lìbar scrit par la Clara Bingham e par la Laura Leedy Gansler ch'al cuntàva di fat sucès dabòṅ, qvéi dal caś giudisiàri Jenson v. Eveleth Taconite Co..
Par cla pelìcula chè, giràda in dal Minneśòta e in dal Mèsic Nóṿ c'n un budget ad trénta-sinc migliòṅ ad dòlar minga tut purtâ pò a cà, la prutagunìsta Charlize Theron l'è andàda in a risć ad vìns'r al Prèmi Òscar acsè cuma la Frances McDormand, tuti e dū numinàdi.
Sunt
La Josey Aimes (Charlize Theron), màd'r ad dū fiōi, Sam (Thomas Curtis) e la Karen (Elle Peterson), la tórna a vìvar da i sò genitōr, Hank (Richard Jenkins) e l’Alice (Sissy Spacek), in un paiśèṅ dal nòrd dal Minneśòta dòp èsar scapàda via da 'n marè ch'al gh mitìva 'l maṅ adòs. La vita par lē la n è minga fàcila anc parchè sò pàd'r al n gh'à mai pardunâ i sò śbali dal pasâ quànd l'andàva cun tut i ragàs ch'l'incruśàva. Inólt'r al sò mistēr ad paruchéra al n gh parmét briśa ad far sù di bèsi abàsta par tiràr avànti.
Su cunsìli dna sò amìga camiunìsta, la Glory Dodge (Frances McDormand), la decìd 'd andàr a lauràr sèg in na minéra 'd fèr, adès ch'l'è vgnuda fóra na léǵ ch'la parmét a cal dóni ad far tut i mistēr cumpàgn a i óm. Ma in cal mónd lè dûr da masć al ròbi i s fànan dimóndi bruti par lē par via dgl'umiliasiòṅ e di schèrs ch'l'è custréta a patìr, specialmènt da part ad Bobby Sharp (Jeremy Renner).