Nel buio del terrore
|
C'l artìcul chè 'l è scrit in
Miranduléś |
 Nel buio del terrore
| ||
 La Marisa Mell in na figùra dal film | ||
| In dal scûr dal terōr 1971 | ||
|---|---|---|
| Regìa: José Antonio Nieves Conde | ||
| Scritōr: Juan José Alonso Millán Giovanni Simonelli • Juan Miguel Lamet | ||
| Atōr: Marisa Mell • Stephen Boyd • Fernando Rey Sylva Koscina • Massimo Serato • Simón Andreu Howard Ross • Alejandro de Enciso • Mario Álex | ||
| Müsica: Carlo Savina | ||
| Léngua: Spagnōl | ||
| Dürä dal film: 94 minüt | ||
| Nasiōṅ: Itàglia • Spaggna | ||
Nel buio del terrore (In dal scûr dal terōr) 'l è 'n film thriller dramàtic dal 1971 ad José Antonio Nieves Conde.
In Itàglia 'l è cgnusû anc c'n al tìtul ad Diabolicamente sole con il delitto mént'r in Spaggna, ch'i 'l aṅ prudót insém, al s ciàma Historia de una traición o anc Carla e Lola.
Sunt
La Carla (Marisa Mell) la fà la scaja e di óm in dal sò lèt i gh in pàsan dimóndi cuma 'l pitōr Alfred (Stephen Boyd), a gràtis, o 'l industriàł Luis Montalban (Fernando Rey), a pagamènt. Chi lē la n al s fà minga scapàr via e acsè la taca a far la vita còmda da lò. Ma la dóna la gh'à anc n'amìga „particulàra“, la Lola (Sylva Koscina), ch'la fà la camaréra 'd albêrg e che lē la vōl ch'la vaga a star in dla sò vila par tgnir adrē a i sò visi malnét. Luis però al gh buta subìt 'l òć adòs dvintànt al sò amànt ma a la Carla a n gh in ciàva gnint, qvél ch'l è impurtànt par lē 'l è ch'la Carla l'armagnìs a vìvar sèg.
Un dè, méntar la Carla l'è in dal bòsc a far-as far un ritràt da Alfred, i rìvan dū tepìsta ch'i vōlan mnar al maṅ. Durànt la casutarìa òṅ 'd qvi lè (Alejandro de Enciso) al s bèca na scurtlàda in dla pansa ma a s trata 'd un tragatèṅ parchè al curtèl 'l éra fint. La Carla, cardénd che Alfred al 'l àppia cupâ dabòṅ, la dmanda a 'l pitōr 'd a n dir gnint a la pulisìa p'r a n pasàr mia di guàj. Turnànd a cà la dóna la lèś su 'n giurnàł che Luis 'l è mòrt in 'n incidènt 'd aparéć, pò a s fà viṿ c'l àtar tepìsta (Howard Ross) par dmandàr-ag sinc-mila dòlar par taśēr. Dòp avér-'g-i dâ la dóna la capìs 'd èsar stada fargàda, anc da Alfred ch'l éra 'd acòrd cun chi dū là e ch'al l'à inturdàda cum a s dév fiṅ da 'l inìsi quànd al fava 'l artìsta rumàntic sèg. La Carla la 'l và a pascàr par śibìr-'g un piàṅ ch'a prév purtàr dimóndi bèsi a tut dū o sinò la 'l denùnsia a la pulisìa par qvél ch'l à fat. La vitma dla traplàda la gh'à da èsar la Lola ch'l'à tradî 'l sò amōr e ch'in cal méntar l'è anc dvintàda rica armagnénd védva. La Carla la gh preśenta Alfred durànt na fèsta spurcaciòna a cà 'd Hugo (Massimo Serato), un sò vèć cliènt ad qvéi più purcùs.