Maurizio Solieri

C'l artìcul chè 'l è scrit in Miranduléś

Maurizio Solieri (Cuncòrdia, 28 'd Avrìl dal 1953) 'l è 'n chitarìsta emigliàṅ, famóś p'r avér sunâ par dimóndi tèmp cun Vasco Rossi e anc c'n al grup dla Steve Rogers Band e dal Custodie Cautelari.

Biugrafìa

Solieri al nas in dla basa mudnéśa in dal 1953. Sò pàd'r al fava 'l mèdag 'd mistēr. Fiṅ da pìcul al tgniva adrē a Elvis Presley e a di grup rock cuma Rolling Stones e Led Zeppelin ólt'r a Jimi Hendrix e a i Beatles.

In dal 1976 al cgnóś Vasco Rossi e al taca a lauràr sèg dand anc al sò cuntribùt a 'l canti cuma in Canzone, Ridere di te, Dormi dormi e Lo show. Da 'l 1988 a 'l 1990 al pasa a la Steve Rogers Band, grup mudnéś cgnusû specialmènt p'r al sìngul Alzati la gonna (Tirà't sù la stanèla). In dal 1991 al tórna a sunàr la chitàra da 'l viṿ par Vasco Rossi ch'l al ciàma “al fiōl pròdig” in sal palc.

In dal 1995 al gh dà incóra 'n taj ma pò al tórna da 'l „cmandànt“ quànd a mōr Massimo Riva par n'uverdóś 'd eruìna. Al sunadōr 'd La Cuncòrdia 'l armàgn sèg in fiṅ a 'l 2012 quànd al „Blasco“ al gh dà 'l bènsarvî via Facebook dgénd-ag «Fà't dar» e cunsiliànd-'g ad «Tgnir-'s adrē» ^[1].