Massimo Calearo
|
C'l artìcul chè 'l è scrit in
Miranduléś |
Massimo Calearo Ciman, cgnusû méj cuma Massimo Calearo (Vicénsa, 23 ad Nuvémbar dal 1955), 'l è un pulìtic itagliàṅ e imprendidōr vènet, elèt a la Cambra di Deputâ p'r al Partî Demucràtic in dal 2008.
Biugrafìa
Calearo, laureâ in Ecunumìa e Cumèrs, fin da śóvan 'l à tgnû a drē a l'aśiénda misa sù da i sò genitōr in dal 1957, purtànd-la avànti e dvintànd presidènt dal grup Calearo che, al dè 'd incō, 'l à muciâ sù tarśènt lavuradōr a gnir a 'dès a 'l incìrca.
Da 'l Maǵ dal 2003 a 'l Avrìl dal 2008 'l è stâ presidènt dl'asuciasiòṅ di industriài ad Vicénsa (la sò sità) dòp èsar stâ presidènt in secónda in di dū an prima. 'L à anc fat al presidènt ad Federmeccanica, la federasiòṅ dal fàbrichi metalmecànichi, al cunsiliér par la Banca 'd Itàglia ad Vicénsa, al presidènt 'd Unicredit dal sò bandi e al cunsiliér 'd aministrasiòṅ dl’Athesis ad Veróna, aśiénda ch'la fà gnir fóra i giurnài Il Giornale di Vicenza, L'Arena e Brescia Oggi.
Deputâ PD, Api, MRN
In dal Mars dal 2008, Walter Veltroni, segretàri dal Partî Demucràtic al al sarnìs, cap dla lista, par la circuscrisiòṅ "Vènet 1" par la Cambra di Deputâ e lì lò al vèṅ elèt, dvintànd mémbar dla Cumisiòṅ p'r i lavōr prudutìṿ, al cumèrs e al turìśum.
In dal Nuvémbar dal 2009, dòp che Pierluigi Bersani 'l iva vins al primàri dal Partî Demucràtic, al al mòla lè[1] dgénd ad n èsar mai stâ ad sinìstra[2].
In séguit al dà vita a 'l muvimènt pulìtic Alleanza per l'Italia insiém a Francesco Rutelli, Bruno Tabacci, Linda Lanzillotta, Lorenzo Dellai, Gianni Vernetti ma pò al s in và al 28 ad Setémbar dal 2010.
Insém a i deputâ Marco Reguzzoni (dla Lega Nord) e Santo Versace (dal Pòpul dla libertà) al dà vita a la léǵ cgnusùda cuma Reguzzoni-Versace-Calearo[3] in apòǵ a 'l Made in Italy.
Al 9 ad Dicémbar dal 2010, cun al davśinàr-as dla vutasiòṅ par mandàr a cà Silvio Berlusconi da cap dal guèraṅ, al mét in pē al Muvimènt di Respunsàbii Nasiunài insém a Bruno Cesario e Domenico Scilipoti[4]. Sinc dè dòp al vóta còntra la musiòṅ ch'la 'l vliva tiràr via da presidènt dal cunsìli, dand na maṅ par lasàr-al al sò pòst.
Al 5 ad Maǵ dal 2011 Silvio Berlusconi 'l al sarnìs cuma cunsiliér p'r al cumèrs a 'l èstar[5].
Pulèmichi
Al giōran 30 ad Mars dal 2012 in n'intervìsta a la ràddio al diś che lò in Parlamènt al n gh và praticamènt piò e ch'al stipéndi par la sò carga al gh sarvìs sōl par pagàr-'s al mutṿo da 12.000 euro a 'l méś[6]. E incóra «A stag a cà a far 'l imprenditōr invéci 'd andàr a schisàr un butòṅ, al n sarvìs a gnint, mè a pèns ch'a n gh andarò piò da chè a la fiṅ dla legiśladùra. Al m stèla andàr a la cambra sōl par schisàr un butòṅ. Dimét'r-um? No parchè a 'l mè pòst al gnarév òṅ dal PD dimóndi ad sinìstra, 'n amìg ad Castro». Sèmpar lè al dà adòs a i fnòć dgénd 'd èsar daśgustâ da 'n baś fra dū parsòni dal sés cumpàgn parchè lò 'l è na parsòna nurmàla ch'a gh piàś al dóni. Walter Veltroni al gh rispónd in pùblic cuntànd-al cuma „na parsòna ch'la fà scarésa“[7].
Culegamènt estéran
Nòti
- ↑ Calearo al mòla al PD unita.it, 6 ad Nuvémbar dal 2009
- ↑ Calearo 'l è drē a dimét'r-as da 'l PD "Partî a sinìstra, a m in vag" repubblica.it, 5 ad Nuvémbar dal 2009
- ↑ Cun la "Reguzzoni-Versace-Calearo" al Made in Italy al dvénta léǵ
- ↑ Scilipoti, Calearo e Cesario insém ma divìś giornale.it, 9 ad Dicémbar dal 2010
- ↑ Guèran, nóṿ segretàri nóṿ, Berlusconi al prèmia i Respunsàbii ilfattoquotidiano.it, 5 ad Maǵ dal 2011
- ↑ In Parlamènt a n gh vag minga ma cun al stipéndi a m pag al mutṿo corriere.it, 30 ad Mars dal 2012
- ↑ Turménta còntra Calearo in dal Twitter, l'arlìa di dirigènt dal PD corriere.it, 31 ad Mars dal 2012