Manhunter - Frammenti di un omicidio
|
C'l artìcul chè 'l è scrit in
Miranduléś |
 Manhunter
| ||
| Manhunter - Frammenti di un omicidio | ||
 William Petersen in na figùra dal film | ||
| Casadōr 'd óm - Cunsèṅ 'd un masamènt 1986 | ||
|---|---|---|
| Regìa: Michael Mann | ||
| Scritōr: Thomas Harris • Michael Mann | ||
| Atōr: William Petersen • Kim Greist • Brian Cox Joan Allen • Dennis Farina • Stephen Lang | ||
| Müsica: The Reds • Michel Rubini | ||
| Léngua: Ingléś | ||
| Dürä dal film: 120 minüt | ||
| Nasiōṅ: Stat Unî | ||
Manhunter - Frammenti di un omicidio (Casadōr 'd óm - Cunsèṅ 'd un masamènt) 'l è 'n thriller americàṅ dal 1986 ad Michael Mann trat da 'l rumànś “Al delìt dla tèrsa luna” ad Thomas Harris. In cla pelìcula chè a s véd par la prima vòlta al persunàǵ 'd Hannibal Lecter (chè ciamâ Lecktor), dvintâ famóś cun la ghigna 'd Anthony Hopkins in dal film Il silenzio degli innocenti dal 1991.
'L è custâ quìndas migliòṅ ad dòlar a 'l incìrca faghénd-an pò sù gnanc nóṿ.
Sunt
Will Graham (William Petersen) 'l è 'n agìnt d'l FBI in pensiòṅ, ritirâ prima dal tèmp dòp avēr ciapâ un masadōr seriàł tarménd, al dutōr Hannibal Lecktor (Brian Cox). Adès che 'd sasèṅ psicupàtig a gh 'n è 'n àt'r in gir, Francis Dollarhyde (Tom Noonan) dit Dint ad Fata, al pulisiòt 'l è custrét a turnàr in servìsi.
P'r incastràr al manìag, ch'al cópa dal famìji in dal nòt ad luna pîna, Will al próa a pinsàr cuma lò e, par far-al méj, al dmanda ajùt a Lecktor in parśòṅ.
La saga
La saga la tōś riferimènt da i rumànś ad Thomas Harris ma i film i n èṅ minga vgnû fóra in d'l órdan giùst:
- Hannibal Lecter - Le origini del male 2007, regìa ad Peter Webber
- Manhunter - Frammenti di un omicidio 1986, regìa ad Michael Mann
- Red Dragon 2002, regìa ad Brett Ratner
- Il silenzio degli innocenti 1991, regìa ad Jonathan Demme
- Hannibal 2001, regìa ad Ridley Scott