Madame Bovary (film 2014)

 Carpśàn

C'l artìcol chè 'l è scrit in Carpśàn

Madame Bovary 'l è 'n film dramàtic francéś-bélgic-americàṅ dal 2014 ed Sophie Barthes, ispirê a 'l romàṅś francéś col stès titol dal Flaubert.

Sunt

In di an dla metê Otsèint, la śóvna Emma, dôp 'd èser chersùda in na famìja cuntadèina francéśa e cun dimòndi insògn romàntic per la testa, la và spóśa a 'l dutōr Charles Bovary, un vèdev ch'al stravèd per lē e 'l la trata anc cun tùt i riguêrd. La mujér però la taca présti a stufères ed na vìta minga tant brilànta, cum i du spōś i ìn drē a purtèr avànti lè in dla provìncia, e pò anc al marì al n'è minga tant eròic cum lē l'l avrèv evlû. A canbièr un puchìn al sòlit tran-tran a 'riva la nutìsia dla grevdànsa edl'Emma, ch'la spéra 'd avéregh un masćìn. Masć al n'l è minga, che invéci a nâs na ragasóla.
L'Emma, sèimper più tolta da n'insoferèinsa p'r el manéri dal marì acsè minga tant eśbìmbli, e per la manéra 'd viver edla famìja, acsè sàinsa tanti rafinatèsi che invéci lē la vrèv, a gh'sèmbra 'd catèr in dla cōrt 'd un śóven studèint al stès gust per chi sògn romàntic che lē la gh'in và mata. Se 'l śóven però al gh'à présti da spustères a Parì per studièr, dòunca a se prà finìr dàint'r in na relasiòun cun un ric proprietàri lè darèint, Rodolphe Boulanger, e pinsèr finànc ed scapèr vìa cun chilò. Minga pusìbil perché chi sògn chè l'Emma la gh'tìn adrē sōl lē e Rodōlf al n'gh'pèinsa gnanc da luntàṅ ed mèter sù un barachìn acsè stranpalê cun l'Emma. Na bèla lettrèina 'd salùt al dè prìma 'd na partèinsa ch'la gh'tgniva sōl lē, l'è la manéra che Rodōlf al cata sù per despgnères dla pràtica edvintèda péśa.

Colegamèint estèren

• (EN) La schéda dal film in sìm'a 'l IMDb.
• (EN) Al trailer dal film in sìm'a youtube.