Ma quando arrivano le ragazze?
|
C'l artìcul chè 'l è scrit in
Miranduléś |
 Ma quando arrivano le ragazze?
| ||
 Fantoni e la Chiara Sani in na figùra dal film | ||
| Mo quànd rìv'n-i cal ragàsi? 2005 | ||
|---|---|---|
| Regìa: Pupi Avati | ||
| Scritōr: Pupi Avati | ||
| Atōr: Claudio Santamaria • Vittoria Puccini Paolo Briguglia • Johnny Dorelli • Augusto Fornari Chiara Sani • Selvaggia Quattrini • Gianni Fantoni Alessio Modica • Eliana Miglio • Enrico Salimbeni | ||
| Müsica: Riz Ortolani | ||
| Léngua: Itagliàṅ • Ingléś • Tedésc | ||
| Dürä dal film: 106 minüt | ||
| Nasiōṅ: Itàglia | ||
Ma quando arrivano le ragazze? (Mo quànd rìv'n-i cal ragàsi?) l'è na cumèdia dramàtica dal 2005 ad Pupi Avati ch'al l'à anc scrita.
La pelìcula l'à vins un Dàvid ad Dunatèl par la culòna sunóra dal mìstar Riz Ortolani.
Sunt
Nick Cialfi (Claudio Santamaria), ch'al lavóra in dal distribudōr ad sò pàdar Ferruccio (Gianni Fantoni), e Giancarlo Zanichelli dit Gianca (Paolo Briguglia), ric ad famìja, i èṅ dū ragàs ad Bulógna ad vint an cun la pasiòṅ dla mùśica. I s cgnós'n in trêṅ in dal méntar ch'i vàn'n a n'audisiòṅ a Perùśa durànt 'l evènt Umbria Jazz e i dvènt'n amìg. Al prim 'l à tacâ a sunàr la trómba par caś tut da par lò, scultànd di disc ad Clifford Brown e andànd a uréć parchè al n éra minga bòṅ 'd lèś'r al spartî mént'r al secónd 'l à imparâ a druàr al saxòfun tgnénd adrē a sò pàdar Ludovico (Johnny Dorelli), èx muśicìsta jazz adès cumercialìsta, spuśâ cun la Greta (Manuela Morabito).
Nick, ch'al gh'à di prubléma a 'ndàr 'd acòrd cun la sò madrìgna Ylenia (Chiara Sani), al s mét cun la surèla 'd Gianca, la Gilberta (Selvaggia Quattrini), méntar lò 'l è inamurâ invéci dla Francesca (Vittoria Puccini), na biónda ch'l iva cgnusû a na fèsta ma ch'l'è bèla impgnàda.
Insém a 'l pianìsta Marcello (Augusto Fornari) e a i fradèi Maramotti, al baterìsta William (Enrico Salimbeni) e Dedo (Alessio Modica) a 'l cuntrabàs, Gianca e Nick, qvél cun più talènt, i daṅ vita a 'n grup ciamâ Joy Spring Quintet. Òṅ di sò braṅ più impurtànt al s intìtula „Mo quànd rìv'n-i cal ragàsi?“.