Lockdown
|
C'l artìcul chè 'l è scrit in
Miranduléś |
 Lockdown
| ||
 Bonds, al caṅ Hitler, Jones e Casseus in na figùra dal film | ||
| Inciavâ dèntar 2000 | ||
|---|---|---|
| Regìa: John Luessenhop | ||
| Scritōr: Preston A. Whitmore II | ||
| Atōr: Richard T. Jones • Anna Maria Horsford Gabriel Casseus • Master P • De'Aundre Bonds Melissa De Sousa • Bill Nunn • Clifton Powell Sticky Fingaz • David "Shark" Fralick • Joe Torry | ||
| Müsica: John Frizzell | ||
| Léngua: Ingléś | ||
| Dürä dal film: 105 minüt | ||
| Nasiōṅ: Stat Unî | ||
Lockdown (Inciavâ dèntar) 'l è 'n film dramàtic dal 2000 ad John Luessenhop. 'L è stâ girâ a Albuquerque e a Santa Fe in dal Mèsic Nóṿ.
A i butghèṅ di cìnema 'l à muciâ sù quatarsènt-sinquantamìla dòlar.
Sunt
Avery Montgomery (Richard T. Jones) 'l è 'n śōvan ad culōr ch'al gh'à la pasiòṅ p'r al nōd. L'è spuśâ cun la Krista (Melissa De Sousa) e al gh'à anc un putèṅ pìcul. Al fà grup cun dū sò amìg, Dre (De'Aundre Bonds) e Cashmere (Gabriel Casseus), òṅ dal ghét ch'al vénd dla dròga e ch'al s ciùla la Dana (Chrystale Wilson), la dóna dal boss Clean Up (Master P) ch'in cal mént'r al s cata in parśòṅ.
Quànd Avery al vins na gara ch'la prév cambiàr-ag la vita a sucéd un fat ch'a gh la ruìna invéci. Lò, Cashmere e Dre i vènan farmâ da la pulisìa parchè i giràvan cun na màchina cumpàgna a qvéla druàda da dū négar par far un cōlp in un fast food in dua l'éra mòrta na ragàsa. In dal mumènt ch'al sò caṅ Hitler al s arvòlta cun la pulisiòta e lē la 'l cópa, Cashmere al pèrd la tèsta e al tira fóra na pistòla ma al vèṅ farmâ prima ch'al la pòsa druàr. I tri i finìsan in parśòṅ ma i culpévui i éran Broadway (Sticky Fingaz), òṅ ch'al gh'iva da dar di bèsi a Cashmere, e 'n sò amìg pò mòrt cla sira lè.
La vita là dèntar 'l è dimóndi dura. Dre al finìs in sèla cun Graffiti (David "Shark" Fralick), al cap dla gang di biànc ch'la cuntròla 'l gir dla dròga. Chi lò al gh i dà sèmpar e pò 'l al dróa anc cuma śugàtul sesuàł. A Avery a gh và méj parchè al finìs cun 'n óm ch'a s cata lè da daśdòt an ma ch'l è drē a èsar lasâ lìbar, Malachi Young (Clifton Powell). Cashmere invéci al pénsa sōl a scampàr a la méj e acsè al s liga a Clean Up, al cap dla gang di négar.