Lilli e il vagabondo
|
C'l artìcol chè 'l è scrit in
Carpśàn |
 Lady and the Tramp | ||
| Lilli e il vagabondo | ||
 Spaghét c'n al pulpéti dèntar par Biagio e la Lilli | ||
| La Lilli e 'l vagabónd 1955 | ||
|---|---|---|
| Scritōr: Ward Greene | ||
| Regìa: Clyde Geronimi Wilfred Jackson • Hamilton Luske | ||
| Senegiadùra: Erdman Penner • Joe Rinaldi Ralph Wright • Don DaGradi • Joe Grant | ||
| Personâǵ: Lilli • Biagio • Gianni • Lisa • Whisky Fido • Tony • Joe • Castôr • Gilda • Toughy • Bull Sara • Si • Am • Boris • Pedro • Rat • Ciàpa-caṅ | ||
| Dupiadōr originêl: Peggy Lee • Barbara Luddy Larry Roberts • Bill Thompson • Bill Baucom | ||
| Mùśica: Oliver Wallace | ||
| Durèda dal cartòun: 76 minût | ||
| Lengua: Ingléś | ||
| Nasiòun/Paēś: Stat Unî | ||
Lilli e il vagabondo (La Lilli e 'l vagabónd in emigliàṅ; Lady and the Tramp in ingléś) 'l è 'n cartòṅ animâ dal 1955 disgnâ e prodòt par l'americàna Walt Disney Productions, vgnû pò fóra col tradusiòṅ anc in dal rèst dal mónd. 'L è 'l è 'l 15śum film dla série di Clàsic Disney, al prim a 'l mónd girâ cun la tecnulugìa widescreen CinemaScope.
In dal 2001 'l è vgnû fóra 'n séguit diretamènt p'r al marcâ d'l home video da 'l tìtul Lilli e il vagabondo II - Il cucciolo ribelle.
Sunt
[mudéfica la surzéia]Gianni e sò mujēr Lisa i vìv'n in na sitadìna dal New England. P'r al dè 'd Nadâł dal 1909 'l óm al fà 'n rigàl a la sò spóśa, na cagnulìna pìcula dla rasa cocker americàṅ ch'i ciàman Lilli. In dal quartēr la bèstia la s fà amìga cun dū àtar caṅ dal pòst, un scottish terrier ad nóm Whisky e 'n chien de Saint Hubert ad nóm Fido. Da n'atra banda dal paéś un caṅ randàś bastàrd (misć schnauzer) ciamâ Biagio al s ràngia cum al pōl, magnànd i scart 'd un risturànt itagliàṅ e punsànd darènt a la feruvìa. Al s dà da far anc par prutéśar da 'n ciàpa-caṅ dū randàś cumpàgn a lò, al bulldog Bull e la pechinéśa Gilda.
C'n al pasàr dal tèmp, la Lilli la fà a mènt ch'i sò padròṅ i aṅ tacâ a tratàr-la in manéra dastacàda ma a gh'è 'n mutìṿ: la Lisa la spéta 'n putèṅ e la nutìsia i gh la dànan Whisky e Fido. In cal méntar a salta sù Biagio, ch'al pasàva par caś da 'd lè, dgénd a la Lilli ch'a sucedrà ch'la sarà misa in secónd piàṅ dabòṅ, esénd ch'i umàṅ i pinsaràṅ sōl a sò fiōl e minga tant a lē.
Quànd a nas al putèṅ, Gianni e la Lisa i gh al faṅ védar dgénd-ag ch'i vuràṅ bèṅ a tut dū. Un giōran però la còpia la gh'à 'd andàr via par soquànt dè e l'è custréta a ciamàr in ajùt la sîna 'd Gianni, la Sara, par tgnir-'g adrē. La dóna la riva insém a 'l sò dó gati siaméśi, la Si e la Am.
Al prubléma 'l è che lì lē la n s cumpatìs pròpria minga i caṅ e dònca la para via la Lilli, tgnénd-la luntàṅ da 'l putèṅ. Al gati pò i èṅ pò dimóndi ghignóśi, i faṅ un masèl in cà e pò i dànan la cólpa a la pòvra Lilli ch'la n gh intràva gnint. La Sara la n in pōl piò, la ciàpa la cagnulìna par purtàr-la in un negòsi 'd bèsti par métar-'g adòs na muśaróla. La Lilli la scapa via ma la s pèrd lung al stradi ch'la n à mai vist. Par sò furtùna a riva Biagio ch'al la salva da dū cagnàs ch'i éran drē a saltàr-'g adòs. Cla sira lè Biagio al gh fà védar cum a s viṿ sénsa padròṅ, pò al la pòrta a séna urdnànd un tónd ad spaghét a 'l luśōr dna candéla. La Lilli la taca a inamuràr-'s ad lò ma la gh'à da turnàr a cà.