Legami sporchi

Da Wikipedia.

C'l artìcul chè 'l è scrit in Miranduléś Emiliàn

Legami sporchi

Edoardo Sala in na figùra dal film
Ligàm muśnènt
2004
Regìa: Giorgio Molteni
Scritōr: Giorgio Molteni
Atōr: Tomas AranaInes NobiliEdoardo Sala
Patricia CondeVincenzo PelusoCyrus Elias
María PedroviejoClaudia Giommarini
Müsica: Gianluca Terranova
Léngua: Ingléś
Dürä dal film: 90 minüt
Nasiōṅ: ItàgliaSpaggna


«
Al ricàt e 'l tradimènt i èṅ al sò armi.»
(Tagline dal film)


Legami sporchi (Ligàm muśnènt) 'l è 'n thriller itagliàṅ e spagnōl dal 2004 ad Giorgio Molteni.

Sunt

Timothy Flanberg (Cyrus Elias) 'l è 'n óm 'd afâr ad dagnóra stant'an che, dòp èsar-'s divìś da sò mujēr, al s è cumpagnâ cun na bèla dóna ch'la gh'à la mità di sò an, la Dalilah Rayney (Ines Nobili), na purcùsa nimàla ch'ad nòt, cun na pirùca blù in cô e na mascra in di òć, la và in dal chat dal sès a far la spurcaciòna cun la webcam ch'i la védan tut druànd al nickname 'd „Hot Ice“ (Giàs Bujènt).

Na sira un śuvnòt buletàri ciamâ Daniel McWilliams (Edoardo Sala) al s insfìlsa 'd nascòst in dla sò vila par śgranfgnàr via quèl. Purtròp durànt al cōlp al vèć al mōr parchè al nàst'r adeśìṿ ch'al gh'iva tacâ in ghigna par far-al taśēr al 'l iva lasâ sénsa fiâ esénd che chi lò al gh'iva 'n brut mâł ch'al gh impedìva 'd respiràr p'r al naś ma sōl par la bóca. Turnâ a cà da sò mujēr Victoria (Claudia Giommarini), na barìsta ch'la lavóra par cal pôc ad bòṅ ad Matt (Vincenzo Peluso), Daniel al fà giùst in tèmp a pagàr 'l afìt 'd òt méś c'n i bèsi dla rapìna.

Timothy, prima 'd èsar masâ, 'l iva fat n'asicurasiòṅ su la vita a la Dalilah e anc al testamènt 'l éra tut da la sò banda e minga da la part ad sò fiōla, la Sylvie (Patricia Conde), parchè al s éra quistiunâ sèg. Chi lē la sènt ch'a gh'è quèl ch'a traśa e dònca la dmanda ajùt a 'n èx pulisiòt, Raymond Toom (Tomas Arana), par catàr al próvi cóntar la Dalilah ch'a sò giudìsi l'iva strulgâ 'n piàṅ par cupàr sò pàdar saénd ch'al gh'iva di prubléma 'd respirasiòṅ. In cal méntar Daniel, ch'al gh'à sèmpar di prubléma 'd bèsi, al dmanda lavōr a la Dalilah cuma giardinēr part time.

Culegamènt estéran