Le calde notti di Caligola
|
C'l artìcul chè 'l è scrit in
Miranduléś |
 Le calde notti di Caligola
| ||
 Monteduro, Colombo e Spitaleri in na figùra dal film | ||
| Al caldi nòt ad Calìgula 1977 | ||
|---|---|---|
| Regìa: Roberto Bianchi Montero | ||
| Scritōr: Piero Regnoli • Roberto Bianchi Montero | ||
| Atōr: Carlo Colombo • Silvio Noto • Patrizia Webley Gastone Pescucci • Enzo Monteduro • Armando Marra | ||
| Müsica: Carlo Savina | ||
| Léngua: Itagliàṅ | ||
| Dürä dal film: 88 minüt | ||
| Nasiōṅ: Itàglia | ||
Le calde notti di Caligola (Al caldi nòt ad Calìgula) l'è na cumèdia eròtica dal 1977 ad Roberto Bianchi Montero.
Sunt
'L è 'n gran dè par la Róma antìga parchè l'è la fèsta dal dio Prìapo, fiōl ad Vénar, cgnusû p'r avér un cas ad c'l àtar mónd. Silvius Notus (Silvio Noto) al fà savér a tuta la gint vgnuda lè che Gaio Giulio Cesare Augusto Germanico dit Calìgula (Carlo Colombo), elèt imperadōr a 'l pòst ad sò cuśèṅ Tiberio (Gastone Pescucci), 'l è drē a rivàr da cla banda dònca Fòrsa Róma e Fòrsa Lóva anc se òṅ dal pùblic al gh fà 'l ségn dl'umbrèla parchè lò 'l è dla Lazio. Na vìrgin l'è bèla prònta p'r èsar sacrificàda a Prìapo e 'l còmpit ad gusàr-la 'l è riservâ pròpria a Calìgula. Ad fóra tut i spétan ch'al pagn biànc al véggna cambiâ cun qvél rós ma i pōlan vansàr parchè quànd a gh'è 'l mâł dla lumàga a n gh'è sant o dio Prìapo ch'a téggna, gnanc al rój i èṅ bòni 'd alvàr-'g-al sù.
La mujér ad Tiberio, la Livia (Patrizia Webley), l'è sèmp'r arliàda sèg parchè al n gh'à mai di bèsi par cumpràr-ag di vistî da spianàr e acsè la decìd 'd andàr a dmandàr quèl a Calìgula che però al n la vōl minga védar e al diś a 'l sò sarvidōr Cassio (Enzo Monteduro) ad paràr-la via parchè al vōl andàr da 'l dutōr Bernardus Barnardus (Enzo Spitaleri) a far-as curàr. Servino (Armando Marra) al sènt incòsa e al và a cuntàr a Kerea (Fernando Cerulli), nemìg d'l imperadōr, la nutìsia.