La setta dei dannati

Da Wikipedia.

C'l artìcul chè 'l è scrit in Miranduléś Emiliàn

The Order
La setta dei dannati

Benno Fürmann in na figùra dal film
La séta di śmaladî
2003
Regìa: Brian Helgeland
Scritōr: Brian Helgeland
Atōr: Heath LedgerShannyn Sossamon
Benno FürmannMark AddyPeter Weller
Francesco CarneluttiRosalinda Celentano
Mattia SbragiaRichard BremmerAdam Levy
Müsica: David Torn
Léngua: IngléśItagliàṅAramàicSirìac
Dürä dal film: 102 minüt
Nasiōṅ: Stat UnîGermàgna


«
Tuti gl'anmi i gh'aṅ al sò prèsi.»
(Tagline dal film)


La setta dei dannati (La séta di śmaladî) 'l è 'n film ad scarésa americàṅ e tedésc dal 2003 scrit e dirèt par Brian Helgeland.

La pelìcula l'à muciâ sù ùndas migliòṅ e mèś a dòlar dòp ès'r-an custàda trénta-sinc.

Sunt

Alex Bernier (Heath Ledger) 'l è 'n prēt americàṅ d'l órdan ultra-urtudós di Carulìnǵ che na vòlta l'iva salvâ l'anma dna ragàsa ciamàda Mara Sinclair (Shannyn Sossamon) faghénd-ag 'n eśurcìśum. Adès ch'l à savû ch'al cap dla sò cungregasiòṅ, pàdar Dominic (Francesco Carnelutti), 'l è mòrt in Vaticàṅ, al decìd ad partìr par Róma parchè lò 'l al cunsìdera pròpria cuma s'al fus sò pàdar dabòṅ.

Rivâ in Itàglia cumpagnâ par la Mara ch'i s èṅ mis insém, i mémbar dla Céśa i gh dìśan ch'al religióś al s éra tòlt la vita e che dònca al n pōl minga èsar saplî in un campsànt cristiàṅ. Alex al và a tōr al cadàv'r ad nascòst e, cun 'l ajùt dla sōra Franca (Maria Cristina Maccà) e dla sōra Marie (Paola Emilia Villa), 'l al saplìs listés in dal simitèri Carulìnǵ dla sità etèrna.

Esénd ch'l à vdû un ségn strâṅ su 'l pèt ad Dominic, Alex al và pò in un negòsi 'd lìb'r antîg in dua 'l pruprietàri (Richard Bremmer) al gh fà lèś'r un tèst ch'al dascór dla figùra dal „Magna-Pcâ“, un religióś minga arcgnusû da la Céśa catòlica ch'al sarév bòṅ ad ciapàr e 'd mandàr śò lò i pcâ di sugèt in punt ad mòrt ch'i n pōlan minga èsar pardunâ da i prevòst'r ufisiài, in manéra ch'gl'anmi ad chi śmaladî lè i pòsan catàr paś. I ségn catâ su 'l còrp ad Dominic i èṅ cumpàgn ad qvéi disgnâ su 'l lìbar.

Alex, insém a 'l sò amìg prēt Carulìnǵ anc lò Thomas Garrett (Mark Addy), al s mét a pascàr al Magna-Pcâ. Al cardinàł Driscoll (Peter Weller), ch'al vōl dvintàr papa, al gh ślunga 'n pugnàł speciàl par masàr-al.

Quànd finalmènt Alex al bèca un tisi ciamâ William Eden (Benno Fürmann), chi lò al gh cunfèsa 'd ès'r al Magna-Pcâ e ch'l è nâ a i tèmp ad Michelàngil quànd chi lò 'l iva fat far la Capèla Sistìna. Al Magna-Pcâ al vrév che Alex al tulìs al sò pòst.

Culegamènt estéran