La seduzione del male
|
C'l artìcul chè 'l è scrit in
Miranduléś |
 The Crucible
| ||
| La seduzione del male | ||
 Daniel Day-Lewis in na figùra dal film | ||
| La sedusiòṅ dal mâł 1996 | ||
|---|---|---|
| Regìa: Nicholas Hytner | ||
| Scritōr: Arthur Miller | ||
| Atōr: Daniel Day-Lewis • Charlayne Woodard Winona Ryder • Paul Scofield • Bruce Davison Karron Graves • Rob Campbell • Jeffrey Jones Peter Vaughan • Joan Allen • Frances Conroy | ||
| Müsica: George Fenton | ||
| Léngua: Ingléś | ||
| Dürä dal film: 124 minüt | ||
| Nasiōṅ: Stat Unî | ||
La seduzione del male (La sedusiòṅ dal mâł) 'l è 'n film dramàtic dal 1996 ad Nicholas Hytner trat da l'òpra „Al griśōl“ 'd Arthur Miller.
'L è stâ candidâ a i Prèmi Òscar par la senegiadùra minga uriginàla e par l'atōra minga prutagunìsta, la Joan Allen. Custâ vint-sinc migliòṅ ad dòlar, al 'n à pò purtâ a cà sèt e tri.
Sunt
In dal 1692, in dla sitadìna dal Massachusetts ad Salem, soquànti ragàsi, cmandàdi par l’Abigail Williams (Winona Ryder), na nòt i decìdan 'd andàr a balàr tuti nudi in dal bòsc, bacajànd di incantéśum 'd amōr girànd intór'n a 'l fōg in dal méntar ch'la Tituba (Charlayne Woodard), la sérva négra dal reverénd Parris (Bruce Davison), la fà di cant tribài dal Barbàdos.
Bcadi da 'l pastōr in parsòna, la Betty, fiōla dal prevòstar, la pèrd i sèns p'r al spaj e la n è più bòna 'd daśdàr-as. In dal vilàǵ, in du a gh'è da ludàr al nòstar Sgnōr in tut i mumènt, a s taca a dascórar ad striarìa. Parris al manda a ciamàr in ajùt al reverénd John Hale (Rob Campbell), espèrt in strìi e dèmun. Chi lò prima al déśda la Betty, pò al diś che a Salem a gh'è 'l Diàvul.
Al ragàsi i tàc'n a dar la cólpa a dal dóni dal paéś anc s'a n è minga véra, in manéra 'd psēr purtàr-ag via i óm ch'i gh piàś'n a lōr. In particulàr l’Abigail la dà adòs a l’Elizabeth (Joan Allen), la mujēr dal cuntadèṅ John Proctor (Daniel Day-Lewis) ch'al gh'à abû na stòria 'd sès sèg fóra da 'l matrimòni ma che pò al l'iva paràda via.
In cal mént'r a Salem i rivan par far giustìsia insém a Parris e a Hale al vice-guvernadōr dla pruìnsa Thomas Danforth (Paul Scofield) e 'l giùdas Hathorne (Robert Breuler). Dòp i prim masamènt p'r impicagiòṅ, Proctor al próa a mét'r-as cónt'r a la Cōrt dgénd 'd ès'r inusènt acsè cuma sò mujēr ch'la spèta anc un putèṅ. Al reverénd Hale, rindénd-as cònt dal masèl ch'l éra drē a far, al próa a dar-'g un taj prumiténd a i cundanâ 'd salvàr-'s in cambi dna cunfesiòṅ, anc s'la gh'is d'èsar frut dna bala. Ma Proctor al và fiṅ in fónd.