La meravigliosa, stupenda storia di Carlotta e del porcellino Wilbur
|
C'l artìcol chè 'l è scrit in
Carpśàn |
 Charlotte's Web
| ||
| La meravigliosa, stupenda storia di Carlotta e del porcellino Wilbur | ||
| La tralèda dla Carlòta 1973 | ||
|---|---|---|
| Scritōr: E. B. White | ||
| Regìa: Charles A. Nichols Iwao Takamoto | ||
| Senegiadùra: Earl Hamner Jr. | ||
| Personâǵ: Wilbur • Charlotte A. Cavatica • Templeton the Goose • Jeffrey Lurvy • Fern Arable • Mrs. Arable Homer Zuckerman • John Arable • Avery Arable Henry Fussy • the Ram • Edith Zuckerman • Mrs. Fussy | ||
| Dupiadōr originêl: Debbie Reynolds Paul Lynde Henry Gibson | ||
| Mùśica: Richard M. Sherman Robert B. Sherman | ||
| Durèda dal cartòun: 94 minût | ||
| Lengua: Ingléś | ||
| Nasiòun/Paēś: Stêt Unî | ||
La meravigliosa, stupenda storia di Carlotta e del porcellino Wilbur (a dìr "La stòria pina ed maravìa e 'd stupōr edla Carlòta e dal ninèin Wilbur", Charlotte's Web in ingléś) 'l è 'n cartòun animê dal 1973 disgnê e prodòt da l'americàna Hanna-Barbera Productions e la Sagittarius Productions. La fóla la còunta l'aventùra dal ninèin Wilbur e dla só amìga la raggna Carlòta.
Sunt edla fóla
In dla fatorìa dla famìa Arable, i ìn nê di gugiulèin, mo 'l chèś a à vlû che ùn 'd quilè el sèva dimòndi cìc, pròpia in arìsć 'd gnìr cupê prìma dal fèsti. A n'gh'è gnanc mèl che la fiulèina dal fatōr, la Fern, la s al tōś a cōr invéci, e la gh'dà anc nòm Wilbur, ch'a s sà cum'i ìn i ragàs... E dòunca chilē la fà tant, ch'la persuèd al pèder 'd an cupèrel minga. Se tut i s cuntintèven, tut a filèva drìt, mo gnanc dòp sē stmàni, al pèder John Arable al dìś ala Fern ch'è gnû 'l tèinp ch'a s vaga a vender Wilbur. A gh'in dispièś, ala Fern, a è lògic, mo a n'gh'è gnanc mèl che Wilbur al và a stèr dal sin edla Fern, al fatōr Homer Zuckerman, ch'al stà 'd cà gnanc tròp più in là.
Incòr fortunê, in dla stala nóva, Wilbur al sèint cantèr na cansòun, da stèr in dal só recìnt. D'indû deśvìnla pò... Serca, serca... ah, mo bèin: l'è na raggna ch'la canta e ch'la gh'tès la só tralèda in élta in sìm'ala só testa, atàc a na trèva lè 'd travèrs. Cla ràggna lè la s egh preśèinta, ch'la s ciàma Carlòta e la gh'śibìs al só salùt! Chelē soratùt la gh'canta na cansòun ch'la gh'vōl tirèr sù 'l morèl, la gh'vōl arsurèr 'l ànim e spronèrel a gòder edla vìta e stèr alégher. Wilbur e la Carlòta i dvèinten amìg e chilē la 'l jùta a salvères da 'l bancòun dal pchèr cun un stratagèma minga urdinàri: in sìm'a 'l stìpit dal recìnt indû Wilbur al s egh śaca p'r al sòn, lē la gh'tès na tralèda e la ghe scrìv in sìma SOME PIG.
A n's éra mai vist prìma che na tralèda la gh'ìs in sìma na scrìta damànd un ricàṁ! I s 'n adàn i cuntadèin ch'i ciàmen subìt Homer, e anc la reśdóra la vōl vèder 'd cuś'a s tràta. Homer al se stupìs che 'l maièl al sèva acsè tant estudiê mèinter che la reśdóra la dìś che, s'ocòr, 'l à da èser al ràggn ch'l è studdiê.
A s sà che 'l reśdōr al gh'à sèinper ragiòun e dòunca a s ciàma tut al vicinê a vèder al prodìgi che 'l gugiōl al sàva scrìver in sìm'ala tralèda acsè tant estuddiê. I vinen lè anca i fotògref e i giornalìsta ch'i ghe scriv'n in sìma di artìcol ed giornèl. Wilbur al và in gìr p'r el fésti a fères vèder acsè tant prodìgiōś e 'l dvèinta anc famōś. La ràggna incòr, la n's cuntèinta minga 'd avér tisû na volta, mo invéci la gh'tès, sèinp'r in élta, in sìm'ala testa 'd Wilbur, na volta la scrìta TERRIFIC e n'ètra volta la scrìta RADIANT. Incòra dal stupōr e dla maravìa a vèder che Wilbur al scrìv dal paròli in sim'a 'l tralèdi!
A s dēv anc pinsèr però ch'a nn'è minga che i ràggn i gh'àpien dimòndi tèinp da stèr a 'l mond e dòunca la Carlòta la tin aviśê Wilbur ch'i ìn drē a gnir avànti i só dè per partìr per cl èter mond, minga però prìma 'd avér mìs śò la só cuvèda 'd sincseintquatòrdeś ragnìn vujê sù dèint'r ind un sachèt ed tralèda. Lē la gh'arcmànda a Wilbur che i ragnèt i faghen na bòuna fin e la volta i pē a 'l ùs lè in sìm'ala trèva. Da cal sachèt 'd ōv lè, i ghe sràn un sincseintùndeś ragnèt ch'i lasaràn la stàla mèinter che invéci i trī Joy, l’Aranea, e la Nellie i armagnaràn lè cun Wilbur a fèregh cunpagnìa e a tgnìregh preśèint ch'l era stê vlû dimòndi bèin dala só mèder Carlòta.