La gatta sul tetto che scotta
|
C'l artìcul chè 'l è scrit in
Miranduléś |
 Cat on a Hot Tin Roof
| ||
| La gatta sul tetto che scotta | ||
 Paul Newman e la Liz Taylor in na figùra dal film | ||
| La gata in sal téǵ ch'al scòta 1958 | ||
|---|---|---|
| Regìa: Richard Brooks | ||
| Scritōr: Tennessee Williams Richard Brooks • James Poe | ||
| Atōr: Elizabeth Taylor • Paul Newman • Burl Ives Jack Carson • Judith Anderson • Larry Gates Kevin Corcoran • Vaughn Taylor • Zelda Cleaver Madeleine Sherwood • Patty Ann Gerrity | ||
| Müsica: Charles Wolcott | ||
| Léngua: Ingléś | ||
| Dürä dal film: 108 minüt | ||
| Nasiōṅ: Stat Unî | ||
La gatta sul tetto che scotta (La gata in sal téǵ ch'al scòta) 'l è 'n film dramàtic dal 1958 ad Richard Brooks trat da 'l drama teatràl umònim ad Tennessee Williams.
Al film 'l è stâ numinâ par siē vòlti p'r i Prèmi Òscar dal 1959 ma al n à minga purtâ a cà gnanc na statṿa.
Sunt
Na nòt in sal tard, Brick Pollitt (Paul Newman) al mét sù soquànti baréri da cursa in dal stadi, arcurdànd i tèmp in dua 'l éra un campiòṅ ad fùtbol americàṅ. Anc se imbariàg pódag al decìd listés al far al parcōrs ma al strabùca faghénd-as na frida ch'la 'l custrìnś a purtàr al fèrli. Insém a sò mujér Maggie (Elizabeth Taylor) dita “la Gata”, al và a catàr i sò genitōr, ch'i stàn'n in Missisìpi, par festegiàr al 65śum cumpleàn ad sò pàdar Harvey (Burl Ives). Dimóndi śò, Brick al pasa tut al sò tèmp stand in cà, bvénd e a n squasànd-as gnanc quànd sò mujér la próa a far la daśnumóśa sèg.
In cal méntar Harvey, turnànd a cà da 'l uśdàl, al n sà minga 'd avér-'g al càncar, sénsa spransa ad guarìr, parchè i suo e i dutōr i n gh'aṅ dit gnint, gnanc sò mujér Ida (Judith Anderson). La Maggie la vrév che Brick al s davśnìs da piò a sò pàdar, e minga sōl par la bòna sòrta cum i faṅ sò fradèl Cooper (Jack Carson) e sò cugnàda Mae Flynn (Madeleine Sherwood), ma a lò a n gh'è gnanc indivìś. Più tard Brick e sò pàdar i s lìtgan dabòṅ, cun Harvey ch'al gh dmanda parchè lò 'l è sèmp'r imbariàg ma sò fiōl al taś, andànd via da 'l us.
Brick al gh'à al magòṅ e al dulōr in dal cōr da quànd al sò mijór amìg Skipper, śugadōr dla sò squàdra e che lò 'l aduràva, al s è tòlt la vita. Quànd Brick al s è spuśa cun la Maggie, Skipper, ch'al vivìva in dl'òra ad Brick, al gh'iva pruâ cun la Maggie in dal tintatìṿ ad far in manéra ch'i dū i s lasìsan ma quànd 'l à vdû ch'a n gh'éra gnint da far, 'l à decìś ad masàr-as.