L'occhio del gatto

Da Wikipedia.

C'l artìcul chè 'l è scrit in Miranduléś Emiliàn

Cat's Eye
L'occhio del gatto

Al putòć ruba-fiâ in dla cambra dla Drew Barrymore
'L òć dal gat
1984
Regìa: Lewis Teague
Scritōr: Stephen King
Atōr: Drew BarrymoreJames WoodsAlan King
Kenneth McMillanRobert HaysCandy Clark
James NaughtonJames RebhornMary D'Arcy
Müsica: Alan Silvestri
Léngua: Ingléś
Dürä dal film: 93 minüt
Nasiōṅ: Stat UnîUlànda


«
Da 'l òć dal gat, un racònt arudlinâ da gróp in góla da part da 'l aṿtōr ad Carrie, ad Shining e 'd La śòna mòrta
(Tagline dal film)


L'occhio del gatto (’L òć dal gat) 'l è 'n film fantàstic dal 1984 ad Lewis Teague ch'a tōś ispirasiòṅ da dū stòri ad Stephen King ch'i fànan part dla sò racòlta Dal vòlti i tórn'n indrē (Quitter inc. e Al curniśòṅ) e da 'n sugèt uriginàl scrit apòsta par 'l ucaśiòṅ.

Sunt

Al film al mét insém tri epiśòdi difarènt ch'i eṅ ligâ fra lōr p'r al fat che 'n gat griś al s móṿ lè dèntar par dar al sò ajùt, specialmènt in dal tèrs in du al dvénta anc prutagunìsta.

Quitters Inc

Un fumadōr ch'a n gh'è vèrs, Dick Morrison (James Woods), al tîṅ a drē a 'n cunsìli di sò amìg e al decìd 'd andàr a la Quitters Inc par pèrd'r al visi dal fum. Quél ch'al n sà minga 'l è che cla clìnica lè, purtàda avànti da 'l dutōr Vinnie Donatti (Alan King), al dróa la turtùra par far pasàr la vója a i sò pasiènt. Dòp avér-ag fat védar ch'al fà dabòṅ e mia da burla, miténd un gat insìma a na gradéla ch'la gh fà ciapàr la scòsa sōl pugiànd-as insìma, Donatti al gh diś ciàr e tónd che s'al fumarà incóra, al farà al stés quèl anc a sò mujér. Spavintâ, Morrison al al tōś in paròla e al śmét subìt ad fumàr ma un dè al rèsta intraplâ in mèś a 'l tràfic e p'r al stress 'l impìsa na cica. I óm ad Donatti, ch'i èṅ sèmpar dapartùt, i al védan e acsè sò mujér l'è custréta dabòṅ a patìr la turtùra dla scòsa lètrica méntar sò marè 'l è lè davànti a lē e al véd incòsa. Al pròsim pas al sarà quél dal taj dal dî manvèṅ. A cal punt lè però Dick al mét da na banda par sèmpar al sigaréti, cavànd-gh-la a guarìr dal tut. Na sira pò al s véd cun i sò amìg par far fèsta e al fà 'n brènds cun chi àtar: 'l è lè ch'al véd ch'a la mujér ad quél ch'a gh'iva cunsiliâ 'd andàr a la Quitters Inc a gh manca un dî.

Al curniśòṅ

Un śugadōr ad tènis, Johnny Norris (Robert Hays), al s mét cun la dóna 'd un malavitōś dimóndi periculōś e catìṿ, Cressner (Kenneth McMillan), 'n óm ch'a gh piàś scumétar e ch'al s pòrta a cà, pròpria par cal mutìṿ lè, un gat ch'al gh l'iva cavàda a pasàr la strada in mèś a 'l tràfic dla sità, pròpria cuma 'l iva dit lò. Quànd al gangster al vèṅ a savér che la sò amànta la gh'iva mis i còran, incasâ négar al s fà purtàr al tenìsta e 'l al custrìnś a far un śóg tràgic: se chi lò al gh la cavarà a far un gir cumplèt 'd intóran a 'l sò apartamènt pòst a 'l ùltim piàṅ 'd un gratacēl, stand ad fóra in sal curniśòṅ, al gh'arà salv la vita, lò insém a la dóna. Norris al taca acsè al sò gir ma al gh'à da patìr i schèrs ad Cressner, ch'al gh sòna la trómba par disturbàr-al, e anc al vènt dimóndi fòrt e un clómb ghignóś ch'a n cata mia quèl àtar 'd méj da far che bcar-'l in di pē ad cuntìnuv méntar lò 'l và avànti. La scumésa però al la vins lò parchè 'l è bòṅ ad finìr tut al gir. Ma 'l boss al n gh'à pròpria minga vója ad rispetàr i pat. 'L à bèla fat cupàr la dóna tajànd-la a pès. Adès a tucarév a lò parchè 'n sicàri 'l è drē a sparàr-ag ma 'l gat 'l al fà strabucàr, parmiténd a Johnny ad masàr-al. Adès 'l è lò ch'al gh'à al curtèl da la part dal mànag: Cressner 'l è custrét a far al sò gir in sal curniśòṅ, catànt incóra 'l vènt e 'l clómb ma lì lò al n è minga acsè furtunâ e al casca śò spaplànd-as sóta i òć dal gat.

Al Generàl

Al gat al riva, viaśànd in un vagòṅ dal tréno, in na sità in du al vèṅ catâ e tòlt in cà da na putìna, Amanda (Drew Barrymore) ch'al gh dà 'l nóm ad Generàl. Sò màdar (Candy Clark) però la n è briśa 'd acòrd parchè la gh'à paùra ch'al pòsa far dal mâl a 'l sò papagàl e acsè la fà star al gat fóra. Generàl però al stà sèmpar lè 'd intóran parchè 'l à vdû un troll pìcul e mustruóś andàr dèntar e lugàr-as in dla cambra 'd Amanda. Na nòt al móstar al próa a 'ndàr adòs a la putìna méntar l'è drē a durmìr ma 'l gat 'l è śvélt e al al para via ma sōl dòp ch'al troll 'l iva cupâ 'l papagàl. Quànd pò la màdar la 'l vèṅ a savér, la dà la cólpa a Generàl e la 'l manda via, in un negòsi par bèsti, par far-al masàr. La sira dòp, al troll al vèṅ incóra fóra da 'l mur par rubàr al fiâ a l’Amanda ma 'l gat 'l è incóra lè a diféndar-la, esénd gnû dèntar p'r al camèṅ. Dòp na lòta dura, Generàl al buta 'l móstar còntar 'l ventiladōr, spaplànd-al dal tut. Sinténd i sîg dla putìna, i genitōr i rìvan subìt in dla sò cambra da lèt. Vdénd i rèst dal troll i capìsan che l’Amanda la la cuntàva giusta quànd la dgiva ch'al gat al l'iva salvàda la nòt prima. Generàl al pōl star acsè a vìvar sèg.

Culegamènt estéran