L'infedele
|
C'l artìcul chè 'l è scrit in
Miranduléś |
 Infidelity
| ||
| L'infedele | ||
.png) La Kim Delaney in na figùra dal film | ||
| La traditōra 2004 | ||
|---|---|---|
| Regìa: Harry Winer | ||
| Scritōr: Ann Pearlman • Toni Kalem | ||
| Atōr: Kim Delaney • Cristián de la Fuente Kyle Secor • Lara Grice • Michael Arata John Maxwell • Celia Weston • David Jensen | ||
| Müsica: Danny Lux | ||
| Léngua: Ingléś • Spagnōl | ||
| Dürä dal film: 86 minüt | ||
| Nasiōṅ: Stat Unî | ||
L'infedele (La traditōra) 'l è 'n film dramàtic par la televiśiòṅ girâ in dal 2004 p'r Harry Winer.
La pelìcula, trata da 'n lìbar dl'Ann Pearlman, l'è stada giràda in Luiśiàna, a Jefferson Parish, a Kenner e a New Orleans.
Sunt
La Danielle Montet (Kim Delaney) l'è na psicòluga ch'la dascór c'n i sò pasiènt di tradimènt ma in fat ad còran chi lē l'è 'l as ad brìscula esénd ch'la s véd da spés c'n al sò amànt Miguel (Cristián de la Fuente) anc s'l'è bèla spuśàda cun Jim (Kyle Secor).
La dóna l'arà imparâ da cal squasamarléti 'd sò pàdar Hank (John Maxwell) ch'a gh 'n è sèmpar fargâ pôc di fiōi, pròpria cum a la Danielle, a 'l cuntràri 'd sò mujér Lois (Celia Weston) ch'la fà incòsa par la sò famìja. Un dè, méntar 'l è a lèt cun la Julia (Ramona Tyler), na ragàsa ch'la lavóra sèg in negòsi, a Hank a gh vîṅ 'n infàrt e 'l finìs a 'l uśdàł in fiṅ 'd vita par pò murìr dabòṅ soquànt dè dòp.
La Danielle la vrév dascórar a quàt'r òć cun Miguel ch'ad mistēr al sòna la trómba a 'l St. James anc se pò al n s la trómba minga parchè la dóna la vrév reśìst'r a 'l visi ch'al gh'à tacâ Hank, par dimustràr in cōr suo 'd èsar difarènta da lò. Rivàda in dal sò apartamènt la 'l bèca a lèt cun n'atra dóna alóra la tórna a cà cun la vója 'd baśàr sò marè. Purtròp par lē sò cugnâ Eric (Michael Arata), marè 'd sò surèla Patty (Lara Grice), al l'à vduda quistiunàr-'s in strada cun Miguel e la sira dòp a séna al và adrē ad cuntìnuv dascurénd dla litgàda, sèg e cun Jim ch'al n la tōś minga tant bèṅ, specialmènt dòp ch'l è andâ a scuriuśàr su 'l sò telefunèṅ pîṅ 'd mesàǵ ad Miguel.