L'arbitro
|
C'l artìcul chè 'l è scrit in
Miranduléś |
 L'arbitro | ||
 Stefano Accorsi in na figùra dal film | ||
| 'L àrbitar 2013 | ||
|---|---|---|
| Regìa: Paolo Zucca | ||
| Scritōr: Paolo Zucca | ||
| Atōr: Stefano Accorsi • Geppi Cucciari • Jacopo Cullin Benito Urgu • Marco Messeri • Francesco Pannofino Alessio Di Clemente • Paolo Floris • Marco Cadau | ||
| Müsica: Andrea Guerra | ||
| Léngua: Itagliàṅ • Sardagnōl • Ingléś Ulandéś • Spagnōl • Francéś | ||
| Dürä dal film: 78 minüt | ||
| Nasiōṅ: Itàglia • Argintìna | ||
L'arbitro (’L àrbitar) l'è na cumèdia dal 2013 ad Paolo Zucca ch'al l'à anc scrita tulénd spunt da 'n sò curtumetràǵ ch'l à vins al Dàvid ad Dunatèl in dal 2009.
La pelìcula, giràda in biànc e négar, l'è stada sarnìta par far part dal "Giurnàdi di aṿtōr" a la 70śma móstra dal cìnema 'd Venèsia.
Sunt
[mudéfica la surzéia]'L Atletico Pabarile l'è na squàdra 'd fólbar sardagnōla ch'la śōga in dal campiunàt ad tèrsa categurìa dla regiòṅ ma l'è piutòst lòfi tant ch'in dal giròṅ 'd andàda la n è minga stada bòna 'd muciàr gnanc un punt. I sò rivài stòric i èṅ qvéi dal Montecrastu cmandâ p'r al ghignóś Brai (Alessandro Di Clemente) ch'al dà adòs a i śugadōr d'l Atletico anc in dla vita 'd tut i dè parchè chi lōr i lavóran la sò tèra.
Un dè a tórna da 'l Argintìna Matzutzi (Jacopo Cullin), un vèć vśèṅ ad cà d'l alenadōr d'l Atletico, Prospero (Benito Urgu). Cun chi lò in camp la sò squàdra la taca a vìns'r a ròt ad còl mént'r al śōv'n al s fà strada in dal cōr dla fiōla 'd Prospero, la Miranda (Geppi Cucciari). Purtròp par lōr a gh ś mét in mèś 'l àrbitar Mureno (Francesco Pannofino) ch'al gh fà pèrdar na pardìda dand-ag sèmpar cónt'r in dal deciśiòṅ.
In cal méntar, a livèl nasiunàł, 'l ambisióś àrbitar Cruciani (Stefano Accorsi), ch'al s pòrta adrē 'l scutmàj 'd „al prìnsip“ parchè 'l è dimóndi stimulèṅ, al farév incòsa p'r èsar sarnî par la finàł 'd cópa e 'l gh'à anc 'l apòǵ dal pès grôs dla “FEFA” Jean Michel (Grégoire Oestermann) e 'd Candido (Marco Messeri), mémbar dla federasiòṅ. A gh sarév sōl da dar un cuć a na squàdra impurtànta...