L'alba dei morti dementi
|
C'l artìcul chè 'l è scrit in
Miranduléś |
 Shaun of the Dead
| ||
| L'alba dei morti dementi | ||
 L'Ashfield, Pegg e Frost in na figùra dal film | ||
| L'alba di deficènt mòrt 2004 | ||
|---|---|---|
| Regìa: Edgar Wright | ||
| Scritōr: Simon Pegg • Edgar Wright | ||
| Atōr: Simon Pegg • Nick Frost • Kate Ashfield Dylan Moran • Lucy Davis • Penelope Wilton Bill Nighy • Nicola Cunningham • Keir Mills | ||
| Müsica: Dan Mudford • Pete Woodhead | ||
| Léngua: Ingléś | ||
| Dürä dal film: 99 minüt | ||
| Nasiōṅ: Régn Unî • Frància | ||
L'alba dei morti dementi (L'alba di deficènt mòrt) l'è na cumèdia ingléśa e francéśa dal 2004 'd Edgar Wright, prima part dla „trilugìa dal Curnét“ ch'l'è cuntinuàda pò cun Hot Fuzz dal 2007 e cun La fine del mondo dal 2013.
Al film 'l à fat sù da piò ad trénta migliòṅ ad dòlar esénd-an custâ sōl siē.
Sunt
Shaun (Simon Pegg) 'l è 'n impiegâ ingléś in un negòsi ch'al vénd di eletrudumèstic ch'l à pasâ da pôc i trénta. Al s divertìs la sira andànd a bévar quèl a 'l pub “Winchester” sèmp'r insém a 'l sò amìg Ed (Nick Frost), un budlòṅ bòṅdagnìnt ch'al n fà gnint tut al dè a part śugàr a i śōg vìddeo stravacâ in sal divàṅ. Chi lò al viṿ sèg in 'n apartamènt insém anc a Pete (Peter Serafinowicz), un lavuradōr sèri, sèmpar cun la camìśa e la cruàta adòs, ch'al n s cumpatìs minga Ed, tròp pìgar p'r i sò gust. Anc la muróśa ad Shaun, la Liz (Kate Ashfield), la n al pōl védar parchè 'l è gréś cum la śmalta e pò al tira ad cal scuréśi da 'rmàgn'r-ag séc.
Un dè p'r al stradi ad Lóndra i tàcan a véd'r-as di śómbi. Shaun al gh'à 'd andàr a tōr sò màdar Barbara (Penelope Wilton), al sò padrìgn Phillip (Bill Nighy) e la Liz par mét'r-i a 'l sicûr. Chi lē la divìd la cà cun la Dianne (Lucy Davis) e cun David (Dylan Moran), na còpia 'd muróś fra n'atōra da quàtar sòld e òṅ ch'al sà tut lò.