Jack Rodwell

Da Wikipedia.
C'l artìcul chè 'l è scrit in Miranduléś Emiliàn
Rodwell a i tèmp dal Manchester City


Jack Christian Rodwell, cgnusû méj cuma Jack Rodwell (Southport, 11 ad Mars dal 1991) 'l è 'n śugadōr ad fólbar ingléś dal Sunderland e prim' incóra d'l Everton e dal Manchester City. Al gh'à anc tri preśénsi in dla nasiunàl dal sò paéś, fati a cavàl di an 2011 e 2013.

'L è élt 188 cm, al péśa 80 chilo e 'l śōga in mèś a 'l camp cun di còmpit difensìṿ. In dla Premier League 'l à sgnâ déś gòi in tut in sènt-sinquànta incóntar. In dal 2010 'l è stâ mis da la rivìsta spagnōla Don Balón in dla lista di śugadōr ad balòṅ più braṿ fra qvéi nâ dòp al 1989.

Rodwell al taca a śugàr a balòṅ in dal 1998 in dla squàdra di pulśèṅ d'l Everton. Al gh armàgn par déś an pò al taca finalmènt a ès'r impgnâ in prima squàdra in fiṅ a 'l 2012 quànd al và a śugàr a Manchester. C'n i Citizens però al śōga sōl sédas partìdi sgnand dū gòi in di an 2012/2014 prima 'd cambiàr incóra club.

Da quànd in d'l Istâ dal 2014 'l è pasâ a śugàr par trédas migliòṅ 'd euro in dla squàdra ad Sunderland, qvéla di Gat Négar, 'l à dimustrâ 'd èsar lò 'l as ad brìscula di gat négar parchè cun lò in camp da 'l inìsi al sò team al n à mai vins gnanc 'n incóntar su trénta-dū tintatìṿ[1]. Praticamènt 'l è da 1241 dè ch'al n è minga bòṅ ad vìnsar, fra 'l àtar 'l à anc sarnî al nùmar 17 su la sò maja.

Cla maledisiòṅ chè la s śònta a qvéla dal galéś Aaron Ramsey che quànd al fà gòl pò un famóś al mōr al dè dòp.

Nòti

  1. Sunderland, Rodwell "gat négar": cun lò in camp a n s vins mai Gazzetta Dello Sport, 24 'd Utóbar dal 2016