Il diavolo in blu

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Devil in a Blue Dress
Il diavolo in blu
Diavolo in blu.png
Albert Hall e Washington in na figùra dal film
Al diàv'l in blù
1995
Regia: Carl Franklin
Scritùr: Walter Mosley • Carl Franklin
Atùr: Denzel WashingtonLisa Nicole Carson
Tom SizemoreJennifer BealsDon Cheadle
Maury ChaykinTerry KinneyBeau Starr
Müsica: Elmer Bernstein
Lengua: Ingléś
Dürä dal film: 102 minüt
Nasiòṅ: Stat Unî


«
'N investigadōr cóntar-vója. Na dóna misterióśa. Na sità curóta.»
(Tagline dal film)


Il diavolo in blu (Al diàv'l in blù) 'l è 'n thriller noir dal 1995 ad Carl Franklin trat da 'n rumànś ad Walter Mosley.

A 'l cìnema 'l à muciâ sù sédas migliòṅ ad dòlar a 'l incìrca dòp ès'r-an custâ vint-sèt.

Sunt

Da quànd 'l à pardû al lavōr Easy Rawlins (Denzel Washington) 'l è in buléta sparàda dònca, avénd di prubléma a pagàr al mutṿo dla cà, al decìd ad far un lavursèṅ ch'al gh'à śibî 'l sò amìg barìsta Joppy (Mel Winkler) par cònt dal gangster Dewitt Albright (Tom Sizemore), qvél ad catàr l'amànta dal candidâ sìndig Todd Carter (Terry Kinney), na dóna ch'la vistìs da spés ad blù e ch'l'è sparìda sénsa dir gnint ciamàda Daphne Monet (Jennifer Beals).

Esénd ch'a la dóna i gh piàś'n i négar, Easy al decìd 'd andàr-la a pascàr in soquànt bar frequentâ da dla gint ad culōr. In òṅ ad qvist chè chi lò al bèca 'l sò amìg Dupree Brouchard (Jernard Burks) cun la ciùca e 'l decìd ad purtàr-'l a cà insém a la sò dóna, la Coretta James (Lisa Nicole Carson). Chi lē, ch'l'è piutòst malnéta, la s buta fra i sò bras par na gusadìna méntar Dupree 'l è a lèt ch'al pònsa. Easy al gh'astà p'r avēr dgl'infurmasiòṅ da la dóna ch'la gh diś 'd ès'r amìga dla Daphne e ch'al la pōl catàr da 'n sèrt Frank Green (Joseph Latimore).

La matìna dòp la pulisìa la và a cà 'd Easy parchè i aṅ catâ 'l cadàvar dla Coretta e lò 'l è stâ 'l ùltim a védar-la viva. Easy, sinténd pusa 'd bruśâ, al decìd ad ciamàr in ajùt un sò amìg ad quànd al stava in Tèxas prima 'd spatinàr in Califòrgna, Mouse Alexander (Don Cheadle).

Culegamènt estéran