Il cacciatore di aquiloni
|
C'l artìcul chè 'l è scrit in
Miranduléś |
 The Kite Runner
| ||
| Il cacciatore di aquiloni | ||
 La Leoni e Khalid Abdalla in na figùra dal film | ||
| Al casadōr ad cuméti 2007 | ||
|---|---|---|
| Regìa: Marc Forster | ||
| Scritōr: Khaled Hosseini • David Benioff | ||
| Atōr: Khalid Abdalla • Zekeria Ebrahimi Shaun Toub • Homayoun Ershadi • Nabi Tanha Ali Dinesh • Saïd Taghmaoui • Elham Ehsas Atossa Leoni • Ahmad Khan Mahmidzada Abdul Salam Yusoufzai • Nasser Memarzia Mustafa Haidari • Larry Brown • John de Lancie | ||
| Müsica: Alberto Iglesias | ||
| Léngua: Ingléś • Rus • Urdu • Pashtu • Dari | ||
| Dürä dal film: 122 minüt | ||
| Nasiōṅ: Stat Unî | ||
Il cacciatore di aquiloni (Al casadōr ad cuméti) 'l è 'n film dramàtic dal 2007 ad Marc Forster trat da 'l rumànś umònim ad Khaled Hosseini. Al film, ch'in Itàglia 'l è vgnû fóra al 28 ad Mars dal 2008 e ch'l è stâ girâ in Califòrgna e in Cina, 'l à muciâ sù da piò ad stanta-tri migliòṅ ad dòlar esénd-an custâ vint.
In dla culòna sunóra, scrita p'r Alberto Iglesias e numinàda p'r i Prèmi Òscar dal 2008, i s càt'n anc i braṅ Kiss me deadly dla Lita Ford e Beds are burning di Midnight Oil.
Sunt
Amir (Zekeria Ebrahimi) e Hassan (Ahmad Khan Mahmidzada) i èṅ dū putèṅ ad Kabul. Al prim 'l è 'n pashtun fiōl 'd un sgnōr dal pòst, Baba (Homayoun Ershadi), e dna dóna mòrta durànt al part, c'l àt'r invéci 'l è 'd rasa hazara e baghét dal sér'v ad cà, Alì (Nabi Tanha). Amir 'l è sòlit invintàr-as dal stòri che pò al scriv e al lèś a Rahim (Shaun Toub), amìg ad sò pàdar, e a Hassan che par lò al gh'à 'n amirasiòṅ e 'n tacamènt dimóndi élt tant che quànd Amir al gh dmanda se lò al sarév prònt a magnàr dla śmalta s'al gh al dmandìs, lò al gh diś ad sè.
Amir e Hassan i pàsan dimóndi tèmp insém śugànd a far vulàr al cuméti ma i patìsan 'l òdi 'd Assef (Abdul Salam Yusoufzai), un ragasōl rasìsta ch'al n s cumpatìs briśa qvéi c'n i òć a màndula parchè lò, a sò dita, 'l è 'n afgàṅ ad qvéi véra avénd-'g al sangṿ pashtun. Un dè, insém a àtar dū, al vrév dar-'g-i a qvi là ma Hassan al difénd Amir tirànd fóra la sò sfrumbla. Un dè che Amir al vins un turnèo ad cuméti, in dua a gh'è da sćiancàr in vōl al lasi ad chi àtar druànd la sò cuméta, Hassan al gh fà da casadōr andànd a catàr sù al cuméti cascàdi śò in manéra da tgnir-li cuma trufèo. A n vdénd-al minga turnàr indrē, Amir al và a pascàr-al. Assef al 'l à mis in un cantòṅ e p'r andàr via al vōl la cuméta tajàda ma c'l àtar al n gh la dà briśa parchè al gh'à da purtàr-la a Amir. Par dar-ag na lesiòṅ al 'l incùla fòrt cun chi àtar sò dū amìg ch'i al tìnan sòdi in cal méntar. Amir al véd incòsa ma par paùra e par la vargógna 'd ès'r amìg 'd un séruv e 'd un hazara al scapa via. Soquànt tèmp dòp, finìda la punisiòṅ, 'n Hassan sangvinànt al gh pòrta la cuméta.
Par far-la finìda cun lò e par far in manéra che sò pàdar 'l al mandìs via, Amir al lōga 'l sò arlój sóta 'l cusèṅ 'd Hassan e pò al và a cuntàr na bala a sò pàdar, faghénd-'g inténdar che 'l sò amìg al sia 'n làdar. Baba al ciàma a rapòrt al putèṅ e al gh dmanda s'l è stâ lò a śgranfgnàr 'l arlój e Hassan al diś ad sè. Anc se Baba 'l al pardòna, Alì, par salvàr 'l unōr dla sò famìja, al s in và insém a sò fiōl. Soquànt tèmp dòp, durànt l'invaśiòṅ d'l Afghanistan da part di suviètic, Baba 'l è custrét a scapàr via esénd lò pîṅ ad bèsi e nemìg di cumunìsta. Al và a star in di Stat Unî insém a Amir (Khalid Abdalla) ch'al s laùrea in létri, al dvènta 'n scritōr ad sucès e al spóśa la Soraya (Atossa Leoni), la fiōla ad 'n èx generàł afgàṅ, Taheri (Qadir Farookh). Dòp la mòrt ad Baba, Amir al ricév na telefunàda da 'l Pakistan da part ad Rahim. Chi lò al vrév che lò 'l andìs a catàr in 'n urfanutròfi ad Kabul al fiōl 'd Hassan, Sohrab (Ali Dinesh), che pò 'l è sò anvōd parchè Hassan, mòrt par diféndar la cà dal sò ex padròṅ da i talibàṅ, 'l éra 'l fiōl ad Baba e dla mujér 'd Alì ma sò pàdar al n à mai cuntâ gnint a ninsòṅ, a part Rahim, par diféndar la sò reputasiòṅ.