Helicopter Mom
|
C'l artìcul chè 'l è scrit in
Miranduléś |
 Helicopter Mom
| ||
 Dolley, la Loeb e la Vardalos in na figùra dal film | ||
| Màdar sèmp'r adòs 2014 | ||
|---|---|---|
| Regìa: Salomé Breziner | ||
| Scritōr: Duke Tran | ||
| Atōr: Nia Vardalos • Jason Dolley • Skyler Samuels Mark Boone Junior • Kate Flannery • Scott Shilstone Kate Flannery • Devon Werkheiser • Gillian Vigman | ||
| Müsica: Jeff Cardoni | ||
| Léngua: Ingléś | ||
| Dürä dal film: 81 minüt | ||
| Nasiōṅ: Stat Unî | ||
Helicopter Mom (Màdar sèmp'r adòs) l'è na cumèdia americàna dal 2014 dla Salomé Breziner.
Al “madri elicòtar” dal tìtul uriginàł, espresiòṅ dla léngua ingléśa, i èṅ cal màdar ch'i staṅ sèmp'r adòs a i sò fiōi e ch'i métan bèc dapartùt in dla sò vita, cuma s'i fùsan pròpria di elicòtar ch'i gh gìr'n insìma.
Sunt
Lloyd (Jason Dolley) 'l è 'n ragàs ad darsét ch'al và a scōla, dimóndi purtâ p'r al létri e 'l pueśìi. Chi lò al gh'à na màdar, la Maggie (Nia Vardalos), ch'l'è ligàda a lò in na manéra murbóśa tant ch'al śōv'n al vrév che lē la gh stis sù 'd adòs mo invéci gnint, la vōl savēr tut dla sò vita, s'i gh piàś'n i ragàs e s'“al s dà śò la pólvra” méntar lē l'è drē a śguràr al tàvul c'n un stras sù e śò. La dóna la dmanda anc a 'l sò èx muróś Max (Mark Boone Junior), pàd'r ad sò fiōl, ad far dū ciàcri sèg e 'd dir-ag che s'anc al fus fnòć a và bèṅ listés.
In clas Lloyd, al preferî dla sò insgnànta, la sgnōra Moore (Lisa Loeb), 'l è amìg ad Fitch (Devon Werkheiser) e dla Carrie (Skyler Samuels) méntar Brad (Scott Shilstone) al gh dà sèmp'r adòs tulénd-'l anc in gir. Quànd Lloyd al s preśénta a 'l bal dla scōla insém a la Carrie, la Maggie la gh armàgn mâł anc parchè acsè al và in a risć ad pèrdar na bórsa da studi dn'asuciasiòṅ gay p'r andàr a 'l college che lē la s è impgnàda dimóndi par far-'g-l' avēr.