Gocce d'acqua su pietre roventi

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Gouttes d'eau sur pierres brûlantes
Gocce d'acqua su pietre roventi
Gocce d'acqua su pietre roventi.png
Giraudeau, la Levine e la Sagnier
in na figùra dal film
Gósi 'd àqua su dal prédi bujénti
2000
Regia: François Ozon
Scritùr: François Ozon • Rainer Werner Fassbinder
Atùr: Malik ZidiLudivine Sagnier
Bernard GiraudeauAnna Levine
Müsica: Ceská Filharmonie
Susi Dorée • Günter Loose
Lengua: FrancéśTedésc
Dürä dal film: 82 minüt
Nasiòṅ: Frància


«
Da l'òpra teatràla 'd R.W. Fassbinder.»
(Tagline dal film)


Gocce d'acqua su pietre roventi (Gósi 'd àqua su dal prédi bujénti) 'l è 'n film dramàtic francéś dal 2000 trat da n'òpra teatràla 'd Rainer Werner Fassbinder, scrita a daśnóṿ an ma mai purtàda in séna, da 'l tìtul Tropfen auf heisse Steine.

La pelìcula, preśentàda a 'l 50śum Fèstival 'd Berlîṅ, l'à vins un Teddy Award p'r i lungumetràǵ.

Sunt

Prim at

Léopold (Bernard Giraudeau) 'l è 'n óm 'd afâr bisex su i sinquànta. Na sira 'l invìda a cà sua 'n śōvan 'd vint an cgnusû da pôc, Franz (Malik Zidi). Dòp avēr tacâ a dascórar, al ragàs al gh cònta che na muróśa al gh l'à, l’Anna (Ludivine Sagnier), ma ch'adès al s è stufâ 'd gusàr-la. Léopold al gh admànda s'l è mai andâ a lèt cun di óm e Franz al gh rispónd ad nò anc se na vòlta al s è insuniâ 'd far-al. Léopold al salta sù dgénd-ag ch'l è stâ insém a na dóna par sèt an ma ch'a gh piàś da piò far sès cun di masć. I dū i finìs'n a lèt.

Secónd at

Siē méś dòp Franz al viṿ a cà 'd Léopold ch'al ténd a cmandàr in dla relasiòṅ méntar c'l àt'r al subìs e 'l gh'à paùra 'd èsar mulâ. Na nòt Léopold al cònta a 'l sò amànt ad crédar 'd avēr purtâ a masàr-'s òṅ di sò cliènt e che cal fat lè al gh'à fat vgnir al magòṅ.

Tèrs at

Méntar Léopold 'l è via par lavōr, a s fà viva l’Anna ch'la diś a Franz ch'la gh vōl incóra bèṅ. Chi lò 'l è dimóndi śò parchè al s rénd cònt che la pasiòṅ 'd Léopold par lò l'è drē a śmursàr-as. Al ragàs al pasa 'l giurnàdi a piànśar da par lò.

Quàrt at

Dòp dū giurnàdi pasàdi a far 'l amōr insém, l’Anna la dmanda a Franz ad turnàr insém, ad métar sù famìja e 'd far di fiōi. A 'n sèrt punt a tórna cà prima dal prevìst Léopold che quànd al sènt la stòria dl’Anna al s mét a rìdar e pò 'l órdna a Franz ad far-'g al cafè. A riva anc al vèć amōr ad Léopold, la trans Véra (Anna Levine), ch'la diś ad vlēr-'g incóra bèṅ. 'L imprendidōr al śibìs a tut ad far un śuglèṅ a quàtar ma Franz 'l è daśgustâ e vilî e 'l và in n'atra cambra. La Véra la gh tîṅ adrē e vdénd-al piànśar su 'l paimènt la gh cònta ch'la s è uperàda sōl par far-al cuntènt ma che pò gnanc quàl lè 'l è stâ abàsta par tgnir-'s-al stric. Al trans al dmanda a 'l ragàs ad pruàr a far 'l amōr sèg ma chi lò al rispónd ch'l è tròp tard parchè 'l à péna mandâ śò dal vlèṅ e difàti al mōr davànti a i sò òć. La Véra la tórna da Léopold, ch'l è a lèt cun l’Anna, e la gh cònta incòśa. 'L óm prima al n gh créd gnanc pò al diś a la trans ad śuntàr-'s a lèt parchè, anc se lò al n gh'à minga biśógn ad lē, lē invéci la gh'à biśógn 'd lò.

Culegamènt estéran