Giuseppina Strepponi
|
C'l artìcul chè 'l è scrit in
Pramsân |
La Giuseppina Strepponi (in dialètt: la Strepon'na), o pu precizament Clelia Maria Josepha Strepponi (Lôd, 8 setembor dal 1815 – Sant'Agata 'd Vilanóva , 14 novembor dal 1897), l'è städa na soprano italiana, primma äd dvintär la mojera 'd Giuseppe Verdi (dal 1859).
Vitta
Nasuda in t'la famija d'un muzicista, l'à studiè a Milàn e l'à fatt 'na béla cariera dal 1834 al 1846. Mo la so voza l'andäva bén par cantär Rosén, Blén, Donizetti, miga il pärti 'd forsa ch'la vrèva fär quand l'a cognossù Verdi, cme l'Abigaille dal Nabucco che, a dir la veritè, l'è stè al so pu gran sucés, a Milàn mo anca al Teator Regio 'd Pärma. Dòpa l'Ernani (dal 1846) la s'è ritiräda par fär la maéstra 'd muzica.
A partir dal 1847 la s'è misa a vivor con Verdi sensa spozäros (parché l'äva avù du fiól col tenor Moriani): l'è stè un scandol. Verdi l'ariss volsù stär con lè a Busé, mo primma al s'era spozè propria lì con Margherita Barezzi (morta dal 1840): l'à dvu andär via, compräros 'na ca a Sant'Agata e stärogh da lu con la Strepon'na.
I s'en spozè solament dal 1859 e j an pasè tutta la vitta insèmma. Giuseppina l'è morta dal 1897.