Gianluca Pessotto
|
C'l artìcul chè 'l è scrit in
Miranduléś |
Gianluca Pessotto, (Latiśàna, 11 'd Agóst dal 1970) 'l è stâ 'n śugadór ad balòṅ friulàṅ e famóś difensōr dla Juventus. Cun la squàdra turinéśa adès al fà al respunsàbil urganiśatìṿ di setōr di śóvan. Al s è laureâ in léǵ.
Caréra
Pessotto al taca la sò caréra in di śóvan dal Milan. Dòp avér śugâ soquànt an in dal Bulógna e in dal Veróna, al fà al sò debùt in Serie A cun la maja dal Turèṅ al 4 ad Setémbar dal 1994 còntra l'Inter.
'L an dòp al finìs in dla Juventus e al gh rèsta in fiṅ al 2006, śugànd 243 partìdi e sgnand dū gòi. Cun i Piemuntéś al vins sinc scudét (òṅ tòlt via par calciopoli), tri supercópi itagliàni, na Champions League, na supercópa europea, na cópa intercuntinentàla e na cópa Intertoto.
'L à śugâ anc vint-a-dū vòlti cun la maja dla nasiunàl. In dla finàl di Europei dal 2000 còntra la Frància al fà al pasàǵ deciśìṿ par Marco Delvecchio d'l 1-0 p'r i nòstar, ma pò i tranśalpîṅ i vìnsan lìstés cun un golden gol ad David Trezeguet.
Al tentatìṿ ad suicìdi
La matìna dal 27 ad Śugn dal 2006 Pessotto al s fica śò par na fnèstra dla sêd dla Juventus tgnénd in maṅ un ruśàri in dal tentatìṿ ad dar-as la mòrt. Al sa stablìs atàc a l'Alfa 147 ad Roberto Bettega śbragànd-la dal tut ma al scampa listés. Gnû a sarvér-al, Fabio Cannavaro, Gianluca Zambrotta, Ciro Ferrara e Alessandro Del Piero (quàtar juventèṅ) i làsan al ritìr dla nasiunàl di mundiài in Germàgna p'r andàr a catàr-al a 'l uśdàr. Dū an dòp 'l è custrét a dar di bèsi a Bettega ch'al vins la càuśa còntra 'd lò.