Gemma Bovery
|
C'l artìcul chè 'l è scrit in
Miranduléś |
 Gemma Bovery
| ||
 La Arterton e Fabrice Luchini in na figùra dal film | ||
| id. 2014 | ||
|---|---|---|
| Regìa: Anne Fontaine | ||
| Scritōr: Pascal Bonitzer • Anne Fontaine Posy Simmonds • Declan May | ||
| Atōr: Gemma Arterton • Kacey Mottet Klein Fabrice Luchini • Mel Raido • Isabelle Candelier Jason Flemyng • Niels Schneider • Edith Scob Elsa Zylberstein • Pip Torrens • Pierre Alloggia | ||
| Müsica: Bruno Coulais | ||
| Léngua: Francéś • Ingléś | ||
| Dürä dal film: 99 minüt | ||
| Nasiōṅ: Frància • Régn Unî | ||
Gemma Bovery (id.) l'è na cumèdia dramàtica dal 2014 dl'Anne Fontaine trata da la graphic novel umònima dla Posy Simmonds a sò vòlta ispiràda a 'l rumànś Madame Bovary ad Gustave Flaubert.
La pelìcula, preśentàda 'l 6 ad Setémbar dal 2014 a 'l Fèstival ad Turònt, l'à fat sù quàtar migliòṅ e mèś ad dòlar a 'l incìrca dòp èsar custàda dagnóra déś migliòṅ 'd euro.
Sunt
Martin Joubert (Fabrice Luchini) 'l à lasâ Parì da soquànt an p'r andàr a star in Nurmandìa par purtàr avànti, insém a sò mujér Valérie (Isabelle Candelier), al fór'n ad sò pàdar. I dū i gh'aṅ un fiōl śōvan, Julien (Kacey Mottet Klein), ch'al n và minga tant bèṅ a scōla.
Un dè i rìvan da Lóndra par stabilìr-as lè na còpia 'd ingléś, al restauradōr Charlie Bovery (Jason Flemyng), e la sò spóśa dimóndi più śōvna Gemma Bovery (Gemma Arterton), c'n un cagnulèṅ biànc a séguit, Carrington. Martin 'l armàgn fulminâ da cla ragàsa lè parchè l'è bèla e parchè la gh'à 'n nóm ch'l arcòrda tròp qvél dl’Emma Bovary dal sò rumànś preferî, Madame Bovary. Anc sò marè al s ciàma Charlie, praticamènt cumpàgn a 'l Charles dal lìb'r ad Flaubert.
Un dè la Gemma la vîṅ murśgàda a la schina da na béga e Martin al la pòrta in présia da 'l dutōr Rivière (Philippe Uchan) faghénd-as scarusàr par Hervé (Niels Schneider), al fiōl dla rica sgnōra de Bressigny (Edith Scob) ch'al s cata lè par studiàr da par lò in paś in dal castèl ch'i gh'aṅ da cal bandi. Fra i dū śōv'n a scròca la mòla e i tàc'n a gusàr in dal tèmp lìbar anc se Martin, ch'l è dimóndi gelóś, al i à bcâ capénd incòsa.
In paéś a riva anc Patrick Large (Mel Raido), 'l èx muróś dla Gemma, ch'adès a 'l fà 'l crìtic dal magnàr. Martin, sèmpar più gelóś, al decìd ad scrìvar na létra minga firmàda a la sgnōra Bovery pò al gh cunsìlia 'd casàr via 'l vlèṅ a 'l arsènig che lē l'à tòlt par masàr i sórag ch'la gh'à in cà parchè al gh'à paùra ch'la s pòsa tōr la vita cuma l’Emma dal rumànś. Pôc tèmp dòp la Gemma la vîṅ catàda mòrta dabòṅ.