Gas lagarmōl

Da Wikipedia.
C'l artìcul chè 'l è scrit in Miranduléś Emiliàn
Gas lagarmōl druâ par la pulisìa


Al gas lagarmōl 'l è 'n aerosol ad cumpòst chìmig ch'i fànan piànśar s'i finìs'n in di òć o s'a s tira fiâ. Al càuśa bruśōr, làgarmi, prubléma a tgnir i òć avèrt, fadìga a tiràr fiâ e dal vòlti anc gòmit. Al vitmi i próan a far pasàr-'s al mâł strusiànd-'s i òć ma acsè 'l è pèś, in tut al manéri in dal gir ad dū óri a pasa incòsa anc se dal vòlti la còrnea la pōl armàgn'r uféśa.

'L è druâ da spés par la pulisìa in di sit a l'ària vèrta durànt dal manifestasiòṅ ad prutèsta par tgnir sóta cuntròl i tisi arvultóś, ghignóś, rabî, arvèrs e cuntestatàri s'a gh'è da mét'r-i in riga par far rispetàr al règhli sénsa cùr'r al risć ad druàr dgl'armi a 'l sò pòst. Al gas al s cata dènt'r a di candilòt silìndric che, quànd i ciàpan par tèra, i tàc'n a scaldàr-as butànd fóra 'l gas ch'al fà fum.

Al fòrsi d'l órd'n itagliàni i gh 'l ànan in dutasiòṅ da 'l 1991 dòp ch'l è pasâ al DPR 5 Utóbar 1991, n. 359.

La sustànsa druàda da piò in chi gas lè 'l è 'l clôr-acetufenôṅ (C6H3COCH2Cl).

Culegamènt estéran