Fratelli d'Italia (film 1989)
|
C'l artìcul chè 'l è scrit in
Miranduléś |
 Fratelli d'Italia
| ||
.png) La Sabrina Salerno e Jerry Calà in na figùra dal film | ||
| Fradèi 'd Itàglia 1989 | ||
|---|---|---|
| Regìa: Neri Parenti | ||
| Scritōr: Carlo Vanzina • Enrico Vanzina | ||
| Atōr: Christian De Sica • Jerry Calà • Massimo Boldi Sabrina Salerno • Massimo Serato • Maurizio Mattioli Gian • Fabrizio Bracconeri • Nathalie Caldonazzo | ||
| Müsica: Michele Violante | ||
| Léngua: Itagliàṅ • Lumbàrd • Vènet | ||
| Dürä dal film: 100 minüt | ||
| Nasiōṅ: Itàglia | ||
Fratelli d'Italia (Fradèi 'd Itàglia) l'è na cumèdia dal 1989 ad Neri Parenti ch'la mét insém tri epiśòdi ligâ da 'l fat ch'in tut tri a s tōś a nuléǵ na màchina.
In dla culòna sunóra dal film i s càtan di pès dla Sabrina Salerno (Gringo e Sex) e dla Belen Thomas (Survivor e Y Mi Banda Toca el Rock).
Sunt
Prim epiśòdi
Cesare Proietti (Christian De Sica), cumés in un negòsi 'd scarpi 'd Róma gréś cuma la śmalta, al decìd ad partìr insém a Sergio (Fabrizio Bracconeri) e àtar dū sò amìg par na vacànsa in Sardéggna ma la sò màchina tòlta a nuléǵ la 'l lasa a pē lung la strada méntar chi àtar tri i gh la càvan listés a ciapàr al traghét a Sivitavècia.
Faghénd-as pasàr p'r al fiōl d'l industriàł Gardini, Cesare, al dvènta amìg dla fiōla 'd De Benedetti, la Turchese (Nathalie Caldonazzo), ch'la 'l invìda sèg a far na vacànsa in barca in Còsta Śmeràlda cun di àtar sò amìg migliardàri. Quànd chi lē l'incróśa 'l fiōl 'd Mercedes ciamâ Poldino (Sebastian Harrison), ch'al gh śibìs un brasalét ch'al cósta 'n òć dla tèsta, la ragàsa la 'l mòla in quàt'r e quàt'r òt.
Secónd epiśòdi
Al raśunēr Marcolin (Jerry Calà) 'l è impiegâ in dla dita dal cumendadōr Sauli (Gian) ch'al gh'à na fàbrica a Veróna ch'la fà di pandôr. Méntar 'l è a 'l bar insém a di sò amìg, Marcolin al véd pasàr cla bèla figa dla mujér dal sò cap, la Michela (Sabrina Salerno), e 'l scumét un migliòṅ 'd franc ch'al gh la cav'rà a purtàr-'s-l' a lèt.
La ragàsa, ch'la s è spuśàda sōl p'r i bèsi e ch'la ciàma sèmpar sò marè Mona, la gh astà e i dū i decìdan 'd andàr a gusàr in 'n albêrg fóra da i pē a Bèrgam méntar Sauli 'l è in viàś in aparéć p'r i Stat Unî par lavōr. Purtròp par via 'd un siòpar al vōl 'l è scanślâ e 'l cumendadōr 'l è custrét a pasàr la nòt pròpria in dal stés hutèl sarnî da Marcolin, in dla cambra darènt la sua.
Tèrs epiśòdi
Carlo Verdone (Massimo Boldi) 'l è 'n raśunēr milanéś, tifóś sfegatâ dal Milan. Par la prima vòlta in dla sò vita al decìd 'd andàr a védar la sò squàdra a śugàr fóra 'd cà cóntar la Roma. Par via 'd un siòpar a 'l aeropòrt ad Bèrgam, al tōś na màchina a nuléǵ par rivàr in tèmp a Róma ma lung la via 'l incróśa dū periculóś ultras śai-rós péna vgnû fóra da parśòṅ, Romolo (Angelo Bernabucci) e Remo (Maurizio Mattioli).
Carlo 'l è acsè custrét a far finta 'd ès'r un tifóś rumanìsta p'r a n pasàr mia di guàj.