Frònt d'l Óm Basta ch'a sia
|
C'l artìcul chè 'l è scrit in
Miranduléś |
Al Frònt d'l Óm Basta ch'a sia (Fronte dell'Uomo Qualunque in itagliàṅ, “UQ”) 'l è stâ 'n muimènt pulìtig itagliàṅ ligâ a 'l giurnàł L'Uomo qualunque fundâ a Róma in dal 1944 ad òpra dal scritōr e regìsta Guglielmo Giannini. Al purtàva avànti dgl'idéi pupulìsti 'd dèstra dand adòs a 'l sistéma di partî puciànd in dl'anti-pulìtica. In itagliàṅ 'l à dâ vita a 'l neulugìśum “qualunquìśum”.
In dal sò giurnàł i nóm di aversàri i éran sturpiâ e 'l diretōr al bcava i fasìsta e anc i cumunìsta a la stésa manéra dand vóś a 'l pòpul dla strada e a i sitadèṅ. Quànd al 21 ad Śugn dal 1945 Ferruccio Parri, da lò ciamâ Fessuccio Parmi, 'l è dvintâ presidènt dal cunsìli, Giannini 'l à tacâ a dar-'g adòs a róta 'd còl tacànd a muciàr sù dimóndi sustenidōr batśâ “Amìg d'l óm basta ch'a sia”.
In dal 1946 Giannini al decìd ad dar vita a 'n muimènt pulìtig suo e 'l s preśénta a gl'elesiòṅ aministratìvi, specialmènt a 'l sèntar e in Basitàglia. Par lò par guvernàr 'l è abàsta 'n raśunēr bòṅ in carga da 'l prim ad Śnar e ch'al vaga via 'l 31 ad Dicémbar sénsa pò psēr ès'r elèt par gnanc un mutìṿ. Al muimènt al và fòrt specialmènt in Sicìglia in du 'l è bòṅ ad far elèś'r i sò sìndig a Palèrum e a Messina e 'd muciàr sù fra 'l 15% e 'l 20% di vōt in tuta la Basitàglia.
Al muimènt al s dasfiarà soquànt an dòp quànd Giannini al s davśinarà prima a la Demucrasìa Cristiàna 'd Alcide De Gasperi e pò a 'l leader cumunìsta Palmiro Togliatti da lò batśâ sōl dū an prima cuma «vérum, farabùt e falsàri».