Fireproof

Da Wikipedia.

C'l artìcul chè 'l è scrit in Miranduléś Emiliàn

Fireproof

Kirk Cameron in na figùra dal film
A próa 'd fōg
2008
Regìa: Alex Kendrick
Scritōr: Alex Kendrick • Stephen Kendrick
Atōr: Kirk CameronErin BetheaKen Bevel
Stephen DervanEric YoungJason McLeod
Harris MalcomPhyllis MalcomPerry Revell
Alex KendrickRenata WilliamsJoy Joiner
Müsica: Mark Willard
Léngua: Ingléś
Dürä dal film: 122 minüt
Nasiōṅ: Stat Unî


«
Mai bandunàr al tò cumpàgn.»
(Tagline dal film)


Fireproof (A próa 'd fōg) 'l è 'n film rumàntic cristiàṅ americàṅ dal 2008 'd Alex Kendrick, regìsta cristiàṅ (batìsta) anca lò acsè cuma 'l prutagunìsta Kirk Cameron. Anc la culòna sunóra l'è dal gènar cristiàṅ.

Custâ sincsènt-mila dòlar e basta, al film 'l à pò purtâ a cà da piò ad trénta-tri migliòṅ ad dòlar anc s'in di Stat Unî al gh'à abû na distribusiòṅ da rìdar (nuvsènt sali a 'l incìrca).

Sunt

Al capitàṅ dla stasiòṅ di pumpēr 'd Albany in Geòrgia, Caleb Holt (Kirk Cameron), 'l è spuśâ cun la Catherine (Erin Bethea), ch'la lavóra in 'n uśdàl. Dòp soquànt an ad matrimòni però al ròbi i vànan mâł fra lōr dū parchè i n dascóran piò e i lìtgan sèmpar. Lē la n s cumpatìs piò che lò al vaga la sira a védar di sit pòran in dal computer e ch'l àppia tacâ a métar da na banda di bèsi par cumpràr-as la barca di sò insùni, quànd a gh sarév invéci da giustàr 'n us e mét'r a pòst al giardèṅ. Lò invéci al gh'à 'l bali pîni 'd a n catàr mai gnint ad prònt quànd al tórna a cà stuf mòrt dòp avér risćiâ la vita e laurâ par vint-quàt'r óri ad fila.

La còpia la decìd acsè ad dar-'g un taj ma 'n culéga cristiàṅ ad Caleb, Michael Simmons (Ken Bevel), al n è minga 'd acòrd e par rénd'r al cuncèt al gh fà 'l eśèmpi dal sâł e dal pévar, dimóndi difarènt ma sèmp'r insém. Anc i genitōr dal pumpēr, John (Harris Malcom) e la Cheryl (Phyllis Malcom), i gh'àṅ al magòṅ par sò fiōl acsè sò pàdar al gh śibìs ad tōr-as quarànta dè prima ad divursiàr, un perìud ad próa ciamâ "The love dare" (La próa d'l amōr). In cal méntar al gh'arév da lèśar un sò diàri ch'al gh'è stâ ùtil anc a lò quànd, soquànt tèmp prima, anc lōr i èṅ stâ lè lè par mulàr-as prima 'd catàr la religiòṅ.

Da 'l cant suo la Catherine, ch'l'è in pinsēr par sò màdar ch'l'è armàśa uféśa dòp 'n ìctus ma ch'la n gh'à minga di bèsi abàsta par cumpràr-ag na carusìna e 'n lèt adàt a lē, la taca a vśinàr-as a 'n dutōr sò culéga ch'al gh và adrē, Gavin Keller (Perry Revell). Caleb, lśénd tut i dè na paǵna dal diàri, al taca a far qvél ch'a gh'è scrit insìma e a pinsàr a far dal bèṅ par sò mujér ma a quàla là a n gh'è gnanc indivìś. 'L óm 'l è dimóndi śò ma sò pàdar al gh diś ad cuntinuàr parchè al règhli ad Dio i n èṅ minga qvéli dal parsòni. Cuma in dal sò mistēr un pumpēr al n gh'à mai da bandunàr al sò cumpàgn, acsè a gh'à da sucédar anc in dal matrimòni.

Culegamènt estéran