Fair Play

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Fair Play
Fair Play
Fair play.png
Savin e Cassel in na figùra dal film
Śugàr pulî
2006
Regia: Lionel Bailliu
Scritùr: Lionel Bailliu
Atùr: Benoît MagimelMarion Cotillard
Éric SavinJérémie RenierMélanie Doutey
Jean-Pierre CasselMalcolm Conrath
Müsica: Laurent Juillet • Denis Penot
Lengua: Francéś
Dürä dal film: 103 minüt
Nasiòṅ: Frància


«
In di afâr, cum in dal spòrt, tut 'l è parmìs.»
(Tagline dal film)


Fair Play (Śugàr pulî) 'l è 'n film dramàtic dal 2006 ad Lionel Bailliu ch'al 'l à scrit e girâ parténd da 'n sò curtumetràǵ dal 2002, “Squash”, ch'l éra stâ candidâ a i Prèmi Òscar.

Sunt

Édouard (Jean-Pierre Cassel) 'l è 'l pruprietàri dn'aśiénda ch'l à dâ da purtàr avànti a sò śéndar Charles (Éric Savin) dòp che chi lò 'l à spuśâ sò fiōla Isabelle. Na vòlta fra i dū al ròbi i andàv'n anc bèṅ, quànd i gusàv'n i fàv'n al nùmar dla carióla cinéśa, ma adès lò 'l à butâ 'l òć su na sò impiegàda gh la tîṅ adrē a i cònt, la Nicole (Marion Cotillard), mént'r anc lē la s guàrda 'd intóran. In dla dita i gh lavóran anc Alexandre (Jérémie Renier), ch'l à péna abû na prumusiòṅ, Jean-Claude (Benoît Magimel), un rós ad cavìi ch'al pénsa sōl a la caréra e a fargàr chi àtar, e la Béatrice (Mélanie Doutey) ch'la fà la stagìsta, misa lè da sò pàd'r Édouard.

Durànt un gir in barca a rém insém a Alexandre, Jean-Claude al véd ch'i èṅ drē a rivàr da cla banda un grup 'd òt dóni ch'i èṅ drē a far alenamènt par na gara. Vlénd rivàr prima lò a 'l traguàrd, al rós al diś a 'l sò culéga ad tajàr-ag la strada o sinò a n gh sarév vèrs. Miténd al “Fair Play” da na banda e pinsànd sōl par lò, Jean-Claude al fà véd'r a c'l àtar cum a s fà a far i sò interès méntar cal dóni i màgnan la pólvra.

Alexandre al và pò a śugàr a squash insém a Charles che però 'l è dimóndi arliâ sèg parchè 'l à fat andàr a gambi a l'ària 'n afâr p'r avér pardû dal carti e pò al diś ch'al gh fà vgnir al lat a i śnòć parchè al n è minga bòṅ ad tiràr fóra i maròṅ quànd a gh vōl. Adès 'l à decìś ad lasàr-'l a cà, sōl s'al gh la cava a bàt'r-'l a 'l śōg al prév turnàr su la sò deciśiòṅ. A 'l ùltim Alexandre al fà inténdar 'd ès'r-as ciulâ sò mujér ma a n è minga acsè, al l'à sōl sintìda dir dal purcàdi da drē da 'l mur dla cambra da lèt ma qvést 'l è abàsta p'r ingiangulàr 'n àtim Charles e vìnsar lò.

A s vèṅ a savēr che Jean-Claude 'l iva fat na traplàda par fargàr-ag 'l incàrag. Durànt na cursa in di bòsc cun la Nicole, al rós al gh'iva dit ch'al saìva che lē la purtàva via di bèsi ad nascòst na quàlc vòlta par jutàr sò pàdar ch'l éra pîṅ ad dèbit. Par taśēr Jean-Claude 'l iva vlû che lē la purtìs via di fój da 'l dossier 'd Alexandre par métar-'l in di guàj. E l'è andàda pròpria acsè.

Mént'r i śōg'n a gòlf, Édouard al diś a Charles ch'al sà incòsa 'd lò cun la Nicole, ch'al gh mét al maṅ adòs e ch'al fà i còr'n a sò fiōla. Inóltar 'l è vgnû a savēr che la Nicole l'à bèla fat na denùnsia penàla par mulèsti e lò dla śmalta su la sò aśiénda al n la vōl briśa, dònca al gh'à intensiòṅ ad tiràr-ag via 'l incàrag. Par paràr-'s al cûl Charles al vōl cunvìsar la ragàsa a cambiàr idéa e par far-al al s vōl far jutàr p'r Alexandre, ch'al gh'à paùra 'd pèrd'r al pòst. Al mét in pē acsè na gita tut insém par far dal turentìśum, un spòrt periculóś in dua a gh'è da giràr p'r i fiùm e p'r al cascàdi.

Culegamènt estéran