Elesiòṅ in dal daśdutéśum distrét cungresuàł dla Pennsylvania dal 2018

 Miranduléś

C'l artìcul chè 'l è scrit in Miranduléś

Rick Saccone (R)

Gl’Elesiòṅ in dal daśdutéśum distrét cungresuàł dla Pennsylvania dal 2018 i gh'èṅ stadi 'l 13 ad Mars dal 2018 par numinàr al deputâ ch'al gh'iva da tōr al pòst dal republicàṅ Tim Murphy, in carga da 'l 2002, ch'l iva decìś ad dimét'r-as p'r un scàndal ch'l éra vgnû fóra, qvél 'd avēr dmandâ 'd aburtìr a la sò amànta esénd lò invéci 'n dasciòlda-crist patintâ davànti a tut.

Al 18śum distrét cungresuàł dla Pennsylvania

Al teritòri, abitâ da 'n 95,8% ad biànc ch'l à patî dimóndi la criśi d'l asàł, al tira dèntar soquànt quartēr a sud dla sità 'd Pittsburgh e 'l s cata in dal cantòṅ sinìstar dal stat, śò in bas darènt a la Virgìgna Ucidentàla.

I republicàṅ i aṅ candidâ Rick Saccone, i demucràtic Conor Lamb e i libertariàṅ Drew Gray Miller. In un distrét in du 'n an e mèś prima 'l presidènt Donald Trump 'l iva dastacâ 'd dagnóra vint punt l'Hillary Clinton 'l à vins Lamb muciànd sù 'l 49,83% di vōt cónt'r al 49,56% 'd Saccone. Lamb al gh'à abû la méj in dla cuntèa 'd Allegheny (57,24 cóntar 42,25) mént'r al sò rivàł 'l à ciapâ più vōt in dal cuntèi 'd Greene, Washington e Westmoreland.

A s trata 'd un riśultâ a surpréśa anc parchè sōl pôc dè prima dgl'elesiòṅ Trump 'l iva decìś ad métar di dasi su l'impurtasiòṅ d'l asàł e d'l alumìni.

Esénd al dastàc sóta i sinc punt decimài, al partî republicàṅ 'l à decìś ad dmandàr un ricuntéǵ di vōt.

Nòti