Elesiòṅ generàli spagnōli dal 2015

C'l artìcul chè 'l è scrit in Miranduléś

Gl’Elesiòṅ generàli in Spaggna i gh'ènan stadi al 20 ad Dicémbar dal 2015 p'r arnuvàr tarśènt-sinquànta séǵ dal Cungrès di Deputâ e duśènt-òt su duśènt-ssantasiē séǵ a 'l Senàt.

I vutànt i èṅ stâ al 73,2%, al 6,2% da piò ad qvéi dal 2011.

Al partî ch'l à ciapâ più vōt 'l è 'l è stâ 'l Partido Popular (Partî Pupulàr) dal presidènt dal cunsìli in càrag Mariano Rajoy ch'l à fat sù al 28,72% e 123 deputâ ma par lōr l'è stada listés na scòpla parchè i 'n aṅ pardû 63. A 'l secónd pòst i èṅ rivâ i sucialìsta dal PSOE (Partî Sucialìsta di Uperàj dla Spaggna) c'n al 22,01% di vōt e 90 deputâ (vint ad manc in cunfrònt a 'l 2011). A 'l tèrs pòst i gh'èṅ qvéi ad Podemos (A Psém) cun 42 elèt e 12,76% (persentuàla piutòst basa parchè in Catalógna, in dla Cumunità Valensiàna e in Galìsia i èṅ andâ insém a di àtar partî dal pòst faghénd muć cun En Comú Podem, dódas deputâ, Compromís-Podemos-És el moment, nóṿ deputâ, e En Marea, siē deputâ). A 'l quàrt pòst a gh'è Ciudadanos (Sitadèṅ), 13,93% di vōt e quarànta deputâ.

Al Partido Popular 'l è andâ fòrt a Mùrsia (40,44%), in Castìglia-La Màcia (38,17%), in Castìglia e Lèòṅ (39,15%), in Galìsia (37,10%), a La Rioja (38,35%) e in dal sità ad Ceuta (44,89%) e ad Melilla (43,93%). Al PSOE 'l à ciapâ più vōt a 'l sud, in Andaluśìa (31,53%) e in Extremadùra (36,00%). Podemos 'l à pasâ 'l 25% in di Paéś Basc méntar Ciudadanos 'l à fat méj in dla Cumunità ad Madrìd (18,80%). Dimóndi mâł la sinìstra radicàla IU-UPeC 'd Alberto Garzón, sōl dū deputâ e 3,67%: sparpajàr dagnóra 'n migliòṅ ad vōt in tuti 'l regiòṅ, p'r al sistéma eleturàł spagnōł, a n paga briśa.

Dascurénd dal candidàdi dóni a gh'è da dir che la Silvia Barquero dal partî PACMAN l'è armàśa a bèc sut méntar la basca Onintza Enbeita (Euskal Herria Bildu) l'à fat eléśar dū deputâ.

Mariano Rajoy
Pedro Sánchez
Pablo Iglesias
Albert Rivera
Alberto Garzón
Xavier Domènech Sampere